Búrbon kjúklingur - algert góðgæti!

Ég fékk góðar vinkonur sem voru í heimsókn á Akureyri í mat um daginn. Ég var frekar seint á ferðinni og langaði þess vegna að gera eitthvað tiltölulega fljótlegt, en samt eitthvað sem myndi smakkast vel með smá hvítvínsdreitli, já eða öli. Eftir smá umhugsun ákvað ég að prófa að gera búrbon kjúkling, sem er nokkuð þekkt uppskrift af asískum veitingahúsum og er nefnd eftir Bourbon stræti í New Orleans.

Uppskriftin var yndislega einföld og þægileg og tók í raun merkilega lítinn tíma að gera. Niðurstaðan var svo alveg ferlega bragðgóður kjúklingaréttur sem við vorum að narta í það sem eftirlifði kvölds.

3 kjúklingabringur
1 dl soyjasósa
2-3 msk worchestershiresósa
~1 cm ferskt engifer
3 hvítlauksgeirar
1 tsk hvítlaukssalt
1 tsk lauksalt
1 tsk reykt paprika
2-3 þurrkuð chillí
1/2 bolli búrbon (t.d. Jim Bean)
1/4 bolli hvítvín
1 msk eplaedik
1 dl púðursykur
1 maízanamjöl
2 pokar hrísgrjón

Byrjaði á því að gera marineringuna,

setti öll hráefnin nema kjúklinginn og

maizanamjölið í skál.

Blandaði öllu vel og vandlega saman

þar til sykurinn var farinn að leysast upp.

Skar bringurnar niður í bita og blandaði

vel saman við marineringuna. Leyfði

kjúklingnum að liggja í marineringunni 

í sirka klukkustund, en því lengur því betra.

Veiddi svo kjúklinginn upp úr marineringunni 

og steikti á pönnu. Þegar kjúklingurinn var að verða

steiktur í gegn, hellti ég marineringunni út á pönnuna

og sauð með kjúklingnum í sirka 10 mínútur. 

Eftir að hafa fullvissað mig um að 

kjúklingurinn væri tilbúinn, bætti ég smá

maízanamjöli út í og sauð aðeins lengur

eða þar til sósan var farin að þykkna aðeins,

þó ekki of mikið því ég vildi geta notað

sósuna út á hrísgrjónin sem ég bar fram með.

Eins og áður sagði þá var þetta hrikalega bragðgott, sætt en samt sterkt. Engiferbragðið kom vel í gegn, en án þess þó að vera yfirgnæfandi. Þetta verður alveg örugglega gert aftur á þessu heimili :)

Meira síðar.