Kjúklinganúðlur með hnetusósu

Þá er kominn 7. janúar 2015 og ekki seinna vænna að hefjast handa, en eitt af áramótaheitum ársins var að byrja aftur að blogga. Ég hætti svo sem aldrei formlega, en það var mikið um að vera hjá mér í öðrum hlutum lífsins og ég hreinlega gaf mér aldrei tíma til að skrifa hér inn. En nú verður breyting á og ég kem hér af fullum krafti með nýju ári :)

Fyrsta uppskriftin er einföld, góð og þægileg, en þarf alveg að gera ráð fyrir smá tíma, aðallega í að marenera kjúklinginn - restin tekur hins vegar mjög fljótt af, 10 mínútur í mesta lagi. Þannig væri mjög sniðugt að henda kjúklingnum í marerneringuna jafnvel kvöldið áður, eða gera eins og ég gerði - skella honum í mareneringuna og hafa á borðinu í u.þ.b. hálftíma, en auðvitað verður hann betri eftir því sem hann fær að liggja lengur.

Uppskriftin var eftirfarandi ...

Marenering 

2 msk worcestershire sósa

Limesafi úr 1/2 lime

1-2 sítrónugrös, ég notaði þurrkað sítrónugras 1 msk

1-2 msk ljóst sýróp (ég notaði 1 msk)

1 msk sojasósa

1-2 msk saxað ferskt engifer

2 þurrkuð chillí

4 hvítlauksgeirar

400 gr kjúklingalundir eða 2 kjúklingabringur

1/2 rauð paprika, skorin í þunnar stuttar sneiðar

250-350 gr núðlur 

Hnetusósa

3 msk hnetusmjör

1/4-1/2 bolli kókosmjólk (meira eftir smekk) 

2 tsk worcestershire sósa

1-2 þurrkuð chillí eða ef þið eigið góða chillísósu 

1 msk limesafi

1 msk ljóst sýróp

Byrjaði á að útbúa mareneringuna í djúpu fati,

setti einfaldlega allt saman 

og hrærði saman með gaffli

Svo var bara að skera kjúklinginn í bita

og blanda vel saman við mareneringuna

og láta bíða. Ég lét þetta standa á borði

í hálftíma áður en ég skellti á pönnuna.

Æskilegast hefði verið að setja plastfilmu

yfir og inn í ískáp og geyma í a.m.k. 2 tíma.

Á meðan kjúklingurinn saug í sig mareneringuna 

bjó ég til hnetusósuna. Skellti innihaldsefnunum 

saman í litla skál og hrærði saman með gaffli, gæti

eiginlega ekki verið þægilegra. Ég smakkaði hana

svo aðeins til, bætti við smá kókosmjólk eftir smekk

til að hnetusmjörið væri ekki alltof yfirgnæfandi,

bætti líka við smá chillí til að fá aðeins meira "kick".

Svo var bara að skella smá olíu á pönnu og 

steikja kjúklinginn. Þegar kjúklingurinn var að 

verða tilbúinn bætti ég paprikunni út á. Tek fram

að mér fannst bitarnir full fautalegir hjá mér,

myndi frekar sneiða í þynnri sneiðar/bita næst og 

steikti í 2-3 mínútur, þannig að þær voru heitar

en ekki orðnar neitt alltof mjúkar.  

 

Skellti svo núðlunum í pott, eftir að hafa

skolað þær aðeins í vaskinum. þetta var

sirka helmingurinn af því sem var í 

pokanum og reyndist fullmikið. 

Kosturinn við að nota núðlur frekar 

en t.d. spagettí er hversu yndislega 

fljótlegt er að sjóða þær, eða aðeins 

3 mínútur í pottinum. 

Þremur mínútum síðar var bara að taka núðlurnar

úr pottinum og í stóra skál, hella hnetusósunni yfir

og blanda saman við núðlurnar.

Bætti svo kjúklingnum og paprikunni saman við. 

Að lokum var svo bara að njóta.

Þetta reyndist vera hinn ágætasti réttur, léttur og virkilega bragðgóður. Ég mun alveg örugglega gera hann aftur seinna, mun þá reyndar örugglega bæta við ferskum kóriander - held að það myndi algerlega setja punktinn yfir i-ið. Ekki verra að hefja nýtt bloggár á nýjum uppáhaldsrétt :)

Óska ykkur annars öllum gleðilegs nýs árs og hlakka til að eiga góðar matarstundir með ykkur á árinu!

Meira síðar.