Þá er það rétturinn sem sló einna mest í gegn á japanska kvöldinu - eftirrétturinn.
Ég íhugaði lengi vel að búa til ís með grænu tei, en eftir miklar vangaveltur ákvað ég að leita í franska eldhúsið og gera búðing í staðinn fyrir að gera ís og gera þá créme brulée með grænu tei eftir að hafa rekist á það á einhverri heimasíðunni að væri vinsæll réttur í Japan.
Uppskriftin var eftirfarandi ... einföld grunnuppskrift af créme brulée og grænt te
4.5 dl rjómi
4.5 dl nýmjólk
1,5 msk grænt te (duft)
7 eggjarauður
1.5 dl sykur
Byrjaði á að setja rjómann og mjólkina í pott
ásamt græna teinu.
Hrærði öllu vel saman og leyfði hitanum að gera sitt
og ná allt að því suðumarki.
Á meðan setti ég eggjarauðurnar og sykurinn í skál ...
og þeytti þetta saman.
Svo var bara að hella mjólkurblöndunni saman við
eggjablönduna í mjórri bunu og þeyta saman við.
Síaði svo blönduna og hellti á flösku.
Setti svo form í ofnfat og notaði flöskuna til að hella
búðingnum út í á þægilegan hátt.
Hellti svo vatni í fatið þar til það náði formunum
upp að miðju. Skellti þessu svo inn í ofn við u.þ.b. 150°C
í sirka 30-40 mínútur.
Eða þar til búðingurinn var farinn að stífna :-)
Dreifði svo sykri yfir búðinginn, hitaði ofninn í hæsta
og skellti þessu inn í að nýju til að bræða sykurinn.
Út kom svo þessi líka fáránlega bragðgóði búðingur
sem svo sannarlega er óhætt að mæla með :-)
Vona að þið prófið og vona að þið njótið!
Meira síðar.
Ummæli