Chile con carne með chile de queso

Litla systir talaði við mig fyrr í vikunni og spurði hvort ég ætti ekki einhverja góða chile con carne uppskrift. Ég hélt það nú og stóð raunar í þeirri trú að sú uppskrift væri nú þegar komin á bloggið. Svo reyndist ekki vera en þegar hún hafði svo samband við mig í dag og ítrekaði beiðnina um uppskriftina ákvað ég að drífa bara í að skella í chile con carne fyrir bloggið í leiðinni, hún átti jú afmæli í fyrradag og því ekki nema bara gaman að vera þetta fyrir hana ... fyrir utan hvað þetta er helv gott :-)

Uppskriftin var eftirfarandi ... fyrir 3-4 
1 laukur
2 grænar paprikur
2 hvítlauksgeirar
2 pylsur
400 gr nautahakk
1 dós tómatpúrra
3/4 tsk kakó
2 msk chillíduft
1 msk cumin
1/4 tsk kanill
1 tsk oreganó
2 þurrkuð chillí
Svartur pipar og salt
4-5 tómatar eða 1 dós niðursoðnir tómatar
1/2 dl rauðvín
1 dós nýrnabaunir
Kóriander

Byrjaði á því að skera laukinn frekar smátt ...

sem og grænu paprikuna.

Saxaði svo hvítlauksgeirana.

Setti ólífuolíu í pönnu og bætti svo lauknum og paprikunni

út á pönnuna og léttsteikti í nokkrar mínútur.

Bætti þá hvítlauknum út í og leyfði að steikjast aðeins betur.

Skar pylsurnar í þunnar sneiðar.

Setti nautahakkið út á pönnuna og steikti.

Þegar kjötið var steikt bætti ég pylsunum 

út í og blandaði saman við.

Tók svo saman öll kryddin ...

og bætti út á pönnuna ásamt tómatpúrrunni.

Blandaði öllu vel saman og leyfði að steikjast aðeins.

Saxaði tómatana og bætti út á sömuleiðis.

Blandaði öllu vel saman og hellti rauðvíninu út í.

Bætti nýrnabanunum út í sömuleiðis ...

Blandaði enn og aftur öllu saman og leyfði að malla

í sirka 15-20 mínútur. Á meðan kjötið mallaði

þá bjó ég til 1/4 uppskrift af chile de queso.

Svo var bara að hræra kóriander saman við ...

Að lokum ... njóta!

Þetta reyndist virkilega gott - sterkt og gott. Það er fátt sem ég elska meira en sterkan mat og þetta uppfyllti allar mínar kröfur. Mæli eindregið með þessu.

Meira síðar.