Enn heldur tapasþemað áfram! Í þetta skiptið eru það empanadas sem mig langar að deila með ykkur. Þetta eru djúpsteiktir fylltir hálfmánar og var ég með tvennskonar fyllingar; nautahakk og sveppi.
Þetta reyndist vera bæði bragðgott og eiginlega bara pinku skemmtilegt að gera :-)
Uppskriftin var eftirfarandi ...
Deigið
5 dl hveiti
1 tsk salt
1 tsk sykur
5 msk mjúkt smjörlíki eða grænmetisfita
1 egg
80 ml hvítvín
Kjötfylling
Ólífuolía
1 stór laukur
500 gr nautahakk
3-4 hvítlauksgeirar
1-2 tsk oreganó
Salt og pipar
1 dós niðursoðnir tómatar
1 dl grænar ólífur, skornar í tvennt
~1/2 dl rúsínur
Sveppafylling
2 msk smjör
250 gr sveppir
1 laukur
1-2 msk sítrónusafi
1 dl hvítvín
1-2 tsk oreganó
1 tsk basilíka
Salt og pipar
Ólífuolía
Fyrst var að gera deig.
Setti í matvinnsluvélina hveiti, sykri og salti og fituna.
Blandaði vel saman.
Bætti þá út í egginu og hvítvíninu og blandaði saman
þar til deig hafði myndast. Ef deigið er of þurrt, þá
er lítið mál að bæta bara smá víni í viðbót út í blönduna.
Úr varð þessi líka fína deigkúla.
Þá var að gera fyllinguna. Byrjaði á að skera laukinn og hvítlaukinn.
Hellti svo ólífuolíu á pönnu og steikti laukana.
Bætti svo kjötinu út í og steikti þar til það var allt brúnað.
Þá var að bæta ólífunum út í.
Svo auðvitað niðursoðnu tómötunum.
Blanda öllu vel saman og bæta rúsínunum út í ...
og blanda svo kryddunum út í.
Leyfði að malla á hægum hita í sirka korter eða þar til
mesti vökvinn hafði gufað upp.
Skar sveppina í frekar grófa bita, samt ekki of grófa
(haha mikil hjálp í þessari lýsingu ekki satt??)
Skar laukinn frekar fínt.
Skellti svo smjöri í djúpa pönnu og bræddi - hellti svo
sveppunum og lauknum út í.
Skar hvítlaukinn smátt og bætti út á pönnuna.
Bætti oreganó og basilíku út á - sem og salt og pipar.
Leyfði þessu að steikjast - bætti við smá smjöri og hellti svo
sítrónusafanum út á pönnuna.
Svo var bara að hella hvítvíninu út á og svo leyfa þessu að
sjóða og hvítvíninu að gufa upp.
Þá var að gera hálfmánana. Skipti deiginu í 3 hluta.
Flatti deigbitana út og notaði glas til að skera út hringi.
Setti svo sirka 1-2 tsk af fyllingu í miðjuna.
Setti svo kalt vatn í skál og notaði svo puttann til að dreifa vatni
hringin í kringum deighringinn til að hann lokaðist betur saman.
Svo var bara að loka hringnum og mynda hálfmána.
Gerði það sama með sveppafyllinguna.
Safnaði þeim svo saman á bökunarpappír.
Svo var bara að djúpsteikja - mikið fjör :-)
Passið að olían sé nógu heit og snúið hálfmánunum a.m.k. einu sinni.
Eins og áður þá gleymdi ég því miður að taka mynd af lokaafurðinni
en þær má sjá á bakkanum á bak við grænu skálina.
Þetta var mjög gott og ég get eiginlega varla gert greinarmun á milli hvor fyllingin mér þætti betri. Það var svo mjög gott að dýfa þeim í sósuna sem ég gerði fyrir saltfiskbollurnar - Mæli óhikað með þessum. Það er alveg pinku vinna að gera þetta en samt ótrúlega þægilegt og skemmtilegt, ekta fyrir fjölmennt matarboð með mörgum smáréttum.
Meira síðar.
Ummæli