Það hlaut að koma að því að ég kæmi með fisk uppskrift á síðuna! Þeir sem þekkja mig eitthvað vita líklega flestir að ég er með fiskóþol og elda þar af leiðandi eiginlega aldrei fisk, raunar var þetta líklega eitt af fyrstu skiptunum sem ég hef eldað fisk á ævinni - merkilegt nokk. Ævintýri dagsins byrjaði þannig að ég bauðst til að elda fyrir mömmu og pabba, enda alltaf í mat hjá þeim. Ég varð þá auðvitað að prófa einhverja almennilega uppskrift og valdi að lokum eina úr uppskriftabók sem heitir einfaldlega USA Cookbook (fjölbreytt og skemmtileg, mæli með henni)!
Þá var lítið annað að gera en að leita að hráefnunum. Við hér fyrir vestan erum reyndar svo heppin að það er nú fiskbúð á Ísafirði, sem er alger snilld, og það var því lítið mál að rölta til hans Kára og kaupa lúðu. Málið vandaðist hins vegar þegar kom að hnetunum, en það áttu sem sagt að vera macadamiahnetur til að húða lúðuna. Eins og margir vita þá eru það í fyrsta lagi frekar dýrar hnetur (enda trufflur hnetanna) og í öðru lagi alveg stundum ekki til í búðunum, a.m.k. hérna fyrir vestan. En þá er lítið annað en að redda sér og ég notaði einfaldlega pekanhnetur og valhnetur í staðinn og smakkaðist það stórvel, skilst mér.
Uppskriftin var eftirfarandi ...
Mangó chutney
1/2 dl ferskt engifer
3 hvítlauksgeirar
3 lítil þurrkuð chilli
1 1/2 dl maltöl
1/2 dl blasamic vinegar sýróp
1/2 dl rauðvínsedik
2 dl sykur
2 mangó
1 msk saxað kóriander
Kókoskarrý sósa
3 msk rautt curry paste
800 ml kókosmjólk (2 dósir)
Salt
Lúðan
1 dl hveiti
2 stór egg
1/4 tsk cayenne pipar
100 gr hakkaðar hnetur, pekan- og valhnetur
700 gr lúða
60 gr smjör
2 msk kóriander
Tók engifer (uppáhaldið mitt!)
og skar í grófa bita og skellti í matvinnsluvélina,
ásamt hvítlauksgeirunum
þurrkaða chillinu,
1 msk balsamic sýróp,
og 1 msk maltöli
Allt saman komið í matvinnsluvélina
Svo var bara að hakka þetta vel og vandlega,
þangað til þetta var allt orðið fíngert og flott
Svo var bara að skella þessu á pönnuna
Ásamt afganginum af balsamic sýrópinu,
afgangnum af maltölinu
og svo rauðvínsedikinu.
Þá skellti ég sykrinum út í og lét suðuna koma upp
Leyfði þessu svo að krauma í ca. 25 mínútur ...
Á meðan tók ég tvö mangó, afhýddi þau
og skar í litla bita
Á meðan sauð maltsykurblandan
og var orðin sýrópskennd
Skellti svo mangóinu út á pönnuna og blandaði
öllu saman og leyfði að kólna í pönnunni
Þá var að gera kókoskarrýið.
Byrjaði á að skella 3 msk af rauðu curry paste á pönnu
við meðalhita, dreifði vel úr því og leyfði að hitna vel
(átti að nota matarolíu með en gleymdi því, held
það hafi reyndar samt ekkert skaðað...)
Skellti svo kókosmjólkinni út á pönnuna líka og
leyfði að sjóða í ca. 25 mínútur
... eða þangað til blandan hafði rýrnað um helming
en þá lækkaði ég undir og hélt bara heitu
Þá að lokum var það blessuð lúðan eða heilagfiskið
Fékk mömmu til að hjálpa mér að skera í bita,
enda aldrei eldað lúðu áður ... Notaði þrjá bita,
skellti restinni í frysti :-)
Tók svo fram þrjár skálar.
Í eina þeirra setti ég tvö egg og cayenne pipar
Í eina setti ég hneturnar sem ég hafði saxað mjög smátt
Í þriðju skálina setti ég hveiti
Byrjaði á því að hræra saman eggin og piparinn með gaffli
Svo var bara að velta lúðubitunum upp úr hveiti,
myndaði gott lag, en samt engir kögglra
Næst velti ég bitanm upp úr eggjablöndunni
og að lokum upp úr hnetunum þannig að það
myndaðist sæmilega þykk húð
Skellti bitunum svo á ofnplötu, með smjörpappír undir
og hellti smá bræddu smjöri yfir hvern bita
Á meðan hafði mangóblandan kólnað og þá bætti ég
við kóriander út í
Blandaði öllu vel saman og setti í skál
Á meðan hafði lúðan bakast í ofni við 190°C í 15 mín
Skellti svo að lokum sósunni í sósuskál
Voilá, girnilegt ekki satt? :-)
Samkvæmt öruggum heimildum (þ.e. að sögn foreldra minna) þá smakkaðist þetta virkilega vel! Ég smakkaði auðvitað mangóið og sósuna og get staðfest að hvort tveggja var virkilega gott og samkvæmt foreldrum mínum var þetta alveg sérstaklega gott saman og því óhætt að mæla með þessum rétti við hvert tækifæri.
Næst verður sagt frá Azerbaijan kvöldinu sem kom skemmtilega á óvart!
Meira síðar.
Ummæli
Kær kveðja Þuríður