Ný uppáhaldsljóð

Langaði að deila því með ykkur að ég keypti mjög áhugaverða bók í dag.  Bókin heitir Svanurinn minn syngur, Ljóð og líf skáldkonunnar Höllu Eyjólfsdóttur sem tekin var saman af Guðfinnu M. Hreiðarsdóttur, sagnfræðing og bæjarfulltrúa. Í bókinni er sagt frá, eins og fram kemur í titli bókarinnar, lífi og ljóðum Höllu Eyjólfsdóttur en hún var skáldkona frá Laugabóli í Ísafirði.

Ástæða þess að mig langaði að deila þessum kaupum mínum með ykkur er að í þessari bók fann ég mér tvö ný uppáhaldsljóð.  Annað þeirra heitir Hvað býr í stjörnunum? og hitt heitir Sól í sál og eru þau bæði alveg virkilega falleg.  Öll hin eru auðvitað falleg líka, en eitthvað við þessi tvö greip mig strax við fyrsta lestur og langar mig því að deila þeim hér með ykkur.

Hvað býr í stjörnunum?

Ég stari svo hugsandi kvöld eftir kvöld 

á kvikandi grúa af stjarnanna fjöld,

því enginn veit enn hvað þær geyma.

Ó, gæti ég lyft mér og litið þar inn

og leitað hvort framliðni hópurinn minn

á nú í einni þar heima.

Og finndi ég vinina framliðnu þar,

ég fengi við daglegri spurningu svar

um stefnuna ljóssins að löndum,

um vaxandi þroska og viskunnar afl,

hvort væri allt lífið sem einskonar tafl

í eilífum almættis höndum.

---

Sól í sál

Heimsins klungur köld

verða löng og leið

lífið glæpagjöld

dauðinn nöpur neyð

ef ei þekkir þú

drottins milda mál

eina trausta trú,

vanti sól í sál.

Þó af miklum móð

fjöllin sterk og stór

hvæsi gneista glóð

sprengi klettakór,

orka mestu má

kyndir björtust bál

göfug, heit og há

kærleiks sól í sál

Ég vil ítreka að bæði þessi ljóð má finna í bók Guðfinnu M. Hreiðarsdóttur sem heitir Svanurinn minn syngur, Ljóð og líf skáldkonunnar Höllu Eyjólfsdóttur sem gefin var út árið 2008, en mín prentun er önnur prentun árið 2010 og ég hvet ykkur eindregið til að fjárfesta í þessari góðu bók því hún er virkilega góð aflestrar :-)

Meira síðar.