Vestfirðingurinn

Rúllaðar sætar kartöflur

2012-02-11T18:55:00.001Z

Ég fékk góðar vinkonur í mat nýlega og var þema dagsins grænmetisréttir. Ég var auðvitað með tvo aðalrétti, aðallega út af því að mér fannst annar þeirra ekki hljóma nógu mikið eins og aðalréttur til að duga sem aðalréttur fyrir 8 manns. Hann kom þó auðvitað vel út og skemmtilega á óvart - þó ég sé nú samt ekki alveg að kaupa þetta sem aðalrétt, heldur meira sem forrétt eða matarmikið meðlæti. Það sem skipti þó auðvitað mestu máli var að þetta var nú bara virkilega bragðgott :-)

Uppskriftin var eftirfarandi ...

225 gr rjómaostur

5 msk hrein jógúrt

1/2 blaðlaukur

2 msk hakkaðar pekanhnetur

450 gr sæt kartafla

12 allrahanda-ber (all-spice)

4 egg

1 dl rifinn ostur

1 msk sesamfræ

Salt og pipar

Byrjaði á að afhýða sætu kartöfluna

og skar í grófa bita

sem ég setti svo í pott og sauð í 10-15 mínútur,

eða þangað til kartöflurnar voru orðnar mjúkar í gegn.

Á meðan hinar fjallmyndalegu kartöflur suðu aðskildi

ég eggin og eggjarauðurnar

og reif ostinn.

Tók allrahandaberin og muldi í mortéli

Heppnaðist bara býsna vel :-)

En augljóslega getið þið notað líka tilbúið mulið krydd,

sirka1 og 1/2 tsk

Þá voru kartöflurnar soðnar og þá var bara að

setja þær í matvinnsluvélina ásamt muldu

allrahandanu og láta matvinnsluvélina vinna vinnuna

Hakkaði kartöflurnar þar til þær voru orðnar að

kartöflumús

Þá var að setja þær í skál ásamt eggjarauðunum

og ostinum, salt og pipar

og blanda þessu öllu saman með sleif.

Setti kartöflurnar til hliðar í bili og þeytti eggjahvíturnar

allt þar til þær voru farnar að stífna,

en þó ekki of mikið - mega ekki þorna.

Skellti eggjahvítunum smátt og smátt saman

við kartöflurnar

Fyrst gekk það nú hægt ...

bætti við meira af eggjahvítunum ...

og hrærði með sleif og þolinmæði

þar til kartöflurnar höfðu blandast við saman við eggin.

Þá var að taka fram formið (grunnt 33x25 cm) og

setja á smjörpappír (setti smá olíu undir til að halda

pappírnum betur á forminu) og hellti svo kartöfludeiginu á.

Mæli með að smyrja pappírinn líka ofan á, ekkert mikið

- bara rétt til að það sé auðveldara að losa pappírinn síðar.

Reyndi svo að dreifa úr því og jafna eins og kostur var,

notaði pönnukökuspaðann í það ábyrgðarverk.

Skellti forminu svo inn í 200°C heitann ofn í sirka 12 mín.

Út kom þetta líka fallega "brauð" - leyfði því

aðeins að jafna sig og á meðan ...

tók ég til hreint þurrkustykki og setti á það góða ræmu

af bökunarpappír og dreifði sesamfræjunum yfir.

Tók svo kartöflubrauðið af forminu og hvolfdi því á

bökunarpappírinn - ofan á sesamfræin.

Losaði svo bökunarpappírinn ofan af

og braut svo bökunarpappírinn örlítið yfir annan endann

og rúllaði brauðinu svo varlega upp inn í bökunarpappírnum

- passið að gera það hægt og rólega, brauðið er viðkvæmt.

Svo vafði ég þurrkustykkið utan um og setti inn í ískáp

yfir nóttu. Þetta gerði ég kvöldið áður

- sem er alls ekki nauðsynlegt en hentaði mér til að

minnka vinnuna daginn sem matarboðið var.

Þá var að útbúa fyllinguna!

Byrjaði á að saxa blaðlaukinn.

Tók svo pekanhneturnar og setti í matvinnsluvél

og hakkaði frekar fínt.

Tók svo fram skál og setti rjómaostinn þar

ásamt jógúrtinu ...

blaðlauknum og hnetunum -

Notaði svo einfaldlega skeið til að blanda öllu saman.

Svo var bara að rúlla rúllunni út og dreifa

fyllingunni vel og vandlega yfir

og rúlla þessu aftur upp og aftur svo inn í

bökunarpappír og þurrkustykki. Aftur þá

var það raunar ekki nauðsynlegt, en hentaði til að

geyma rúlluna þar til kominn var tími til að borða.

Svo var bara að skera rúlluna í bita og bera fram!

Þetta reyndist vera léttur og bragðgóður réttur - skemmtilegur við öll tækifæri. Kannski sérstaklega skemmtilegur að því leiti að það er ekkert hveiti og enginn sykur ef fólk er að forðast slíkt, en skemmtilegur sömuleiðis því þetta er aðeins öðruvísi bragð og ferskt!

Meira síðar.

Morgunkornskökur

2012-02-07T15:27:00.002Z

Ég veit ekki með ykkur, en ég lendi alltof oft í því að kaupa eitthvað voða gott í búðinni sem ég enda svo á að nota ekki. Til að mynda keypti ég stóran pakka af morgunkorni fyrir langa löngu, keypti hann reyndar fyrir gesti en ég hef svo auðvitað ekkert notað af honum enda borða ég ekki morgunkorn sjálf, nema þegar því hefur verið breytt í sælgæti eða eitthvað slíkt.

En það eru góð ráð dýr þegar maður situr uppi með stóran pakka af morgunkorni sem ég vildi auðvitað ekki henda og svo er ég eiginlega að reyna að forðast sælgæti þannig að það voru góð ráð dýr. Þá datt mér í hug að kökur væru auðvitað ekkert sælgæti - er það nokkuð? :-)

Uppskriftin var eftirfarandi ...
75 ml sykur
112 gr smjör
1/4 tsk salt
1 tsk vanilludropar
1 egg
1 msk mjólk
1 tsk lyftiduft
2 dl hveiti
8 dl morgunkorn (notaði Special K)

Byrjaði á að setja í skál sykur og smjör og þeyta saman

Bæta svo út í vanilludropunum

og egginu og þeyta saman við sykurinn og smjörið

Svo var að bæta við þurrefnunum, hveiti og lyftidufti

og þeyta saman við deigið

og svo bæta út í mjólkinni.

Þá var loks komið að setja morgunkornið út í.

Notaði sleif til að hræra deiginu og morgunkorninu saman.

Svo, út af því að ég stóðst ekki freistinguna og út af

því að ég átti sykurpúða sem voru að skemmast,

þá bætti ég 1 dl af sykurpúðum út í. Ég get ekki

mælt með því að bæta þeim út í þar sem þeir

bráðnuðu og hörðnuðu eiginlega of mikið, það

er þó hugsanlegt ef ofninn væri stilltur á lægri hita

en ég mæli eiginlega bara með að sleppa þeim :-)

Svo var bara að nota skeið til að móta kökur og

raða á ofnplötuna og skella svo inn í ofn sem var

stilltur á 190°C blástur í 10 mínútur.

Voilá - þessar líka fínu kökur sem komu út -

svona fyrir utan sykurpúðavitleysuna í mér :-)

Mæli óhikað með þessari uppskrift til að losna við morgunkorn - passið bara að sleppa sykurpúðunum og að hafa þær ekki of lengi inn í ofninum en þá eru þetta svona líka frábærar, mjúkar og góðar smákökur sem eru tilvaldar til að taka með sér til að borða með morgunkaffinu í vinnunni!

Meira síðar.

Karamellupoppkorn

2012-02-05T14:09:00.000Z

Ég elska sælgæti svo mikið að ég reyni að forðast það að borða það, einu sinni byrjað - get ekki hætt! Kannast einhver við slíkt? :-) Nema hvað, til að halda mér í skefjum þá er reglan sú að ég má aðeins borða nammi sem ég bý til sjálf og eins dugleg og ég er í eldhúsinu þá nenni ég því nú sjaldnast þannig að þetta virkar vel!

Síðasta laugardagskvöld ákvað ég að vera með vidjókvöld og það er fátt betra en að vera með popp með góðri bíómynd. Það sem toppar það þó er þó líklega poppkorn með karamellu - a.m.k. er það mín skoðun eftir að hafa prófað þessa uppskrift.

Innihaldsefnin voru eftirfarandi ...
1 örbylgjupopppoki
2 dl púðursykur
110 gr smjör
1 dl sýróp
1/2 tsk vanilludropar
1/2 tsk matarsódi

Tók fram pönnuna mína og setti á hana púðursykur

og sýróp

og smjör ... mmm - lofar strax góðu :-)

Svo var bara að setja hitann á, meðalhita og

leyfa þessu öllu að bráðna saman en hræra reglulega.

Þegar sykurblandan hafði náð ~120°C

slökkti ég á hitanum ...

og bætti vanillunni út í - passið ykkur og

munið að þið eruð að vinna með sjóðandi sykur

og matarsódanum

Hræra öllu vel saman - en matarsódinn gerir

karamelluna loftkenndari og skemmtilegri

Setti poppið í stóra skál -

nógu stóra til að geta blandað karamellunni og

poppinu almennilega saman án vandræða.

Þá var bara að hella karamellunni yfir poppið

og blanda þessu saman. Farið varlega

karamellan er rosalega heit :-)

Hellti svo poppinu á ofnplötu -

hafið sílikon eða smjörpappír undir

og dreifið poppinu jafnt yfir plötuna og skellið

svo inn í 120°C heitan ofn í sirka hálftíma.

Þannig blandast karamellan jafnar yfir poppið,

auk þess sem það þurrkar poppkornið og

gerir það stökkara.

Hræra svo í poppinu - ágætt að gera það líka

einu sinni á meðan það er inn í ofninum.

Þegar það hefur kólnað er bara að brjóta það upp

og setja í skál - þ.e. ef þið getið beðið svo lengi :-)

Svo er bara að njóta!

Algerlega nýtt uppáhald - er alger sökker fyrir poppi og enn meiri sökker fyrir karamellu þannig að ég get óhikað mælt með þessu fyrir alla karamelluaðdáendur og gefur skemmtilega tilbreytingu frá venjulega poppinu.

Meira síðar.

Engiferbollakökur með mangósmjörkremi

2012-02-02T14:41:00.000Z

Eins og svo margir þá reyni ég að halda mig frá sælgæti og annarri óhollustu. Það er þó ýmislegt sem er meira freistandi en annað, sem á reyndar alveg sérstaklega við um kökur í mínu tilfelli - sérstaklega út af því að mér finnst líka bara svo gaman að baka. Kosturinnv við að baka sjálf er þó sá að ég smakka yfirleitt svo mikið af deiginu að ég enda á að hafa ekki lyst á nema kannski einni kökusneið eða einni bollaköku :-)

Ég keypti mini-sílikon muffinsform um daginn og því kom auðvitað ekkert annað til greina en að skella í bollakökur. Fyrir valinu varð uppskrift sem ég hafði haft augastað á í nokkurn tíma en aldrei þessu vant fann ég hana á netinu.

Uppskriftin endaði svona ... Dugar í sirka 20 mini-bollakökur
Engifersýróp
120 ml vatn
110 gr sykur
Biti af ferskri engiferrót

Kökurnar sjálfar
133 gr hveiti
1/2 tsk lyftiduft
1/4 tsk matarsódi
1/8 tsk salt
1/2 msk malað engifer
1 msk kanill
1/8 tsk negull
65 gr púðursykur
32 gr smjör, brætt
1 egg
3 msk sýróp
90 (87,5) ml vatn

Kremið
15 gr smjör
1/2-1 msk hunang
1 1/2 mangó
3 eggjarauður
82,5 gr sykur
57 ml sýróp
225 gr smjör, mýkt og skorið í bita
1/2 msk vanilludropar
2-4 dl flórsykur

Byrjaði á að gera engifersýrópið.

Tók fram lítinn pott og setti í hann vatn ...

og sykur.

Skar engiferrótina í grófa bita

og skellti þeim út í pottinn.

Svo var bara að leyfa þessu að sjóða þar til

sykurblandan var farin að þykkna aðeins.

Tók þá pottinn af hellunni og leyfði að jafna sig

í u.þ.b. 30 mínútur þannig að engiferbragðið

náði að skína í gegnum sykurinn.

Þá var að gera kökurnar sjálfar. Byrjaði á að

setja öll þurrefnin í sigti

og sigtaði þau saman í stóra skál

Tók svo aðra stóra skál og setti brætt smjörið í,

ásamt púðursykrinum

og egginu ...

og sýrópinu.

Svo notaði ég handþeytara til að þeyta allt saman.

Bætti svo vatninu ...

og þurrefnunum út í - smátt og smátt

og þeytti áfram öllu saman þar til þetta líka

bragðgóða deig hafði myndast.

Þá var að kveikja á ofninum, 180°C blástur, og

raða upp formunum á ofnplötu.

Fyllti formin með deigi að þremur fjórðu hluta

og skellti þeim svo inn í ofninn í sirka 10 mínútur.

Út komu þessar líka girnilegu kökur :-)

Þá var að taka fram engifersýrópið og smyrja

hverja köku með því.

Namm hvað þetta var girnilegt.

Þá var að gera kremið. Byrjaði á að taka mangóið,

afhýddi það og skar í bita.

Tók svo fram pönnu, setti smjör á hana

og hunang ...

og skellti svo mangóinu á pönnuna

og steikti það upp úr smjörinu og hunanginu þar

til mangóið var orðið mjúkt.

Þá var bara að skella mangóinu af pönnunni og

í matvinnsluvélina og púrra mangóið.

Hellti svo mangóinu úr matvinnsluvélinni og í sigti

og "neyddi" mangóið í gegn

Út kom vel sigtað og fallegt mangó.

Tók svo aftur fram fínu pönnuna mína og skellti á hana

sykri og sýrópi, setti á meðalhita.

Á meðan sykurinn var að bráðna, þeytti ég saman

eggjarauðunum þar til þær voru orðnar léttar og ljósar.

Leyfði sýrópinu að malla þar til það náði ~115°C,

takið strax af hitanum og hellið jafnvel í skál

smurða með olíu til að stöðva hitunina.

PASSIÐ að láta það ekki verða of heit því

þá lendið þið í að það harnar og þið þurfið að

byrja alveg upp á nýtt.

Ég hellti svo sýrópsblöndunni út í eggjablönduna,

bara smá í einu

og svo var bara að þeyta þessu saman smátt og smátt,

gera hlé, hella meira sýrópi út í þar til allt sýrópið

var komið saman við.

Þá var að þeyta smjörinu saman við,

skar smjörið í marga bita og bætti þeim út

í skálina smátt og smátt og þeytti þannig

smjörið að lokum öllu saman við.

Á þessu stigi fannst mér kremið fáránlega lint,

þannig að ég bætti út í flórsykri þar til kremið

hafði fengið þá áferð sem ég vildi sjá.

Þá var bara að væta við vanilludropunum og þeyta saman

og svo mangóinu ...

og þeyta öllu saman þanning að úr varð þetta

líka flotta krem. Skellti því svo í

sprautupoka og sprautaði á kökurnar.

Líta vel út ekki satt?

Notaði svo sykursoðið engiferið til að skreyta -

var eiginlega alveg hrikalega gott :-)

Ég verð að viðurkenna að það var aðeins of mikið

af kreminu - en þá var bara að skella restinni í dollu

og lok á og inn í frysti þar sem það býður þess að

verða notað á næsta skammt af bollakökum!

Fróðleiksmoli dagsins er sem sagt að það er ekkert mál að frysta smjörkrem, bara þeyta það aftur þegar hefur afþýðst - alger snilld! Var reyndar lengi að velta fyrir mér hvort þetta væri nú kannski bara ágætis kvöldmatur, þ.e. kremið - en ákvað að það væri nú líklega einum of óhollt, og ekkert sérstaklega gott fyrir magann þannig að þetta varð niðurstaðan :-)

Annað sem var skemmtilegt við þetta krem var að það myndaði svona hálfgerða húð út af karamellunni/sýrópinu þannig að það var ekkert klístrað eða svoleiðis og hélt sér ofsalega vel!

Vona að þið njótið vel!

Meira síðar.

Pönnukökur með smjörhnetufyllingu

2012-01-29T12:47:00.000Z

Það er enn janúar og því hollustan enn í fyrirrúmi. Eða svona eins mikið og hægt er á þessu heimili :-) Það sem af er þessu ári hef ég líka verið ógurlega hrifin af bragðsterkum mat og stóðst ég því ekki freistinguna að prófa þessa - Pönnukökur með kryddaðri smjörhnetufyllingu.

Uppskriftin var eftirfarandi ... fyrir fjóra

Pönnukökudeigið

2 dl hveiti

75 ml maísmjöl (corn meal)

1/2 tsk salt

1/2 tsk chillí duft

2 egg

4 dl mjólk

5 msk smjör eða matarolía

Ríflega 1/2 dl parmesanostur

Fyllingin

2 msk ólífuolía

450 gr smjörhneta

3 þurrkuð chillí

1 blaðlaukur

1/2 tsk timian

1/2 kínakál

1 stk brie ostur

50 gr valhnetur

2 msk steinselja

Skellti í skál öllum þurrefnunum

Bætti út í mjólkinni og eggjunum

og svo var bara að þeyta öllu saman

og setja sirka eina ausu á pönnuna,

sem ég notaði smjörið til að smyrja.

Þær eiga alveg að vera í þykkri kantinum,

en samt ekkert of þykkar :-)

Steikja auðvitað báðum megin og allt þar til

deigið var uppurið og setti pönnukökurnar

til hliðar á meðan fyllingin varð til.

Skar smjörhnetuna í litla bita og

steikti hana á pönnu í sirka 5 mínútur.

Muldi þurrkuðu chillí-in út á og steikti í 1-2 mín í viðbót

Skar blaðlaukinn

og skellti út á pönnuna ásamt timijaninu.

Skar kálið í þunnar ræmur og út á pönnuna,

ásamt steinseljunni og ostinum,

sem ég hafði skorið í grófa bita

Svo að lokum bætti ég hnetunum út á og

blandaði öllu svl saman og leyfði að steikjast

í sirka 2-3 mínútur í viðbót.

Kryddaði svo að loks með salt og pipar.

Þá var allt tilbúið - pönnukökurnar, fyllingin og

stórt eldfast mót sem ég smurði að innan

Setti fyllingu í "hornið" á hverja pönnuköku

og braut svo í tvennt og aftur í tvennt

Skellti svo rifnum parmesanosti yfir allt saman og

setti fatið inn í ofn sem var stilldur á blástur og 200°C.

og voilá! Þessar líka fínu fylltu pönnukökur tilbúnar

aðeins 10-15 mínútum seinna.

Þetta reyndist hin ágætasta máltíð og vel bragðgóð, alls ekki of sterk. Gott meðlæti er t.d. hvítlaukssósa eða grænmetissósa og svo klikkar salatið auðvitað aldrei :-)

Meira síðar.

Heimagert hvítt fudge

2012-01-25T08:48:00.000Z

Annað sem rataði í körfuna hjá vinum þessi jólin var heimagert núggat - sem var eiginlega svo hrikalega gott að ég fæ enn vatn í munninn og ég veit að ég mun seint gera það aftur því ég efast um að ég gæti hætt að borða ef ég ætti það heima :-)

Mætli þó með því að gera og njóta - ekta í gjafir ... enn betra í munni!

Uppskriftin var eftirfarandi ...
1 poki sykurpúðar (~8 dl)
6 dl hvítt súkkulaði
4 dl sykur
110 gr smjör
2 dl rjómi
Saltklípa
Kökuskraut (valfrjálst)

Reif niður sykurpúðana í djúpa pönnu,

hellti rjómanum yfir og kveikti undir og setti á meðalhita

Bætti um leið smjörinu út í,

sem og sykrinum.

Svo var bara að leyfa hitanum að vinna vinnuna sína

og hræra reglulega í - í sirka 5 mínútur eða

þar til þetta hafði allt bráðnað saman.

Tók svo fram eldfast mót 22 cm x 33 cm

og klæddi það með álpappír

Hvíta súkkulaðið tilbúið til notkunar

Sykurpúðarnir og sykurinn vel bráðnað saman

Hellti svo súkkulaðinu út á pönnuna

og þessu hrærði vel saman.

Hellti þessu svo úr pönnunni og í formið,

reyndi að dreifa vel úr og slétta :-)

Dreifði svo kökuskrauti yfir til að gera þetta fallegt.

Skar þetta svo í bita - svona sirka

tvo munnbita

og notaði svo tóma plastkassa undan

kirsuberjatómötum og setti

tvær hæðir af bitum í hvern kassa

Úr varð þessi ágæta jólagjöf :-)

Bragðgott og lítur rosa vel út - getur ekki klikkað! Ekta fyrir alla sælgætisgrísi!

Meira síðar.

Heimagert Dukkah

2012-01-24T12:35:00.001Z

Jólagjafirnar í ár voru mestmegnis heimagerðar og var ég nú bara nokkuð ánægð með útkomuna. Eitt af því sem rataði í mandarínukassana voru krukkur fylltar með heimagerðu Dukkah sem er egypskur hnetu - tja, hvað skal segja - kannski ekki beint réttur - en hugmyndin er sem sagt að dukkah (blanda af hnetum og kryddum) sé borið fram á disk, ásamt disk með ólífuolíu og brauði og/eða fersku grænmeti. Brauðinu er þá dýft í olíuna og þaðan í dukkahð og þaðan beint í munninn og bragðlaukarnir gleðjast :-)

Uppskriftin var eftirfarandi ...
1 poki (100 gr) heslihnetur
1 poki (100 gr) möndlur
1-2 dl jarðhnetur
1 dl sólblómafræ
1 msk kórianderfræ
1 msk cuminfræ
1 dl sesamfræ
1 msk cumin
2 þurrkuð chillí
1 tsk paprika
2 tsk sjávarsalt

Setið álpappír á ofnplötu og

setjið þar möndlur, heslihnetur,

jarðhnetur og sólblómafræ.

Setjið ofnplötuna í ofn stilltan á 180°C í 15 mín.

Passið að hræra reglulega í þessu til að ekkert brenni.

Takið til lítið ofnfat og setjið þar

kórianderfræin ...

cuminfræin ...

og seasamfræin

og malað cumin líka - blandið öllu saman og setjið

inn í ofninn líka, en bara í 5 mínútur - hrærið einu sinni í

og passið að brenni ekki :-)

Þegar hneturnar eru orðnar ristaðar þá er bara að

hella þeim af ofnplötunni og í matvinnsluvélina.

Hakkið þær vel saman - mæli samt með að nota

"púlsinn" ef þið eruð með slíkann takka því ef

þær eru hakkaðar of vel/lengi þá fara þær að gefa frá

sér olíur sem við viljum ekki :-)

Hella svo hökkuðum hnetunum í stóra skál

Þá er að taka kryddin og hakka þau - ég notaði

kaffikvörnina mína, en það er líka hægt að nota mortél

Vel blandað saman og malað.

Hellti kryddblöndunni svo yfir hneturnar

Bætti svo við reyktu paprikudufti ...

muldi þurrkaða chillíið yfir

og svo sjávarsaltið og öllu blandað vel saman.

Þá setti ég líka smá malaðan svartan pipar,

en ekkert mikið af honum samt, kannski 1 tsk.

Úr varð þetta líka flotta og hrikalega góða dukkah!

Ég skipti þessu svo bara niður í krukkur og gaf í jólagjöf. Þetta er raunar tilvalin gjöf, og til dæmis gaman að gefa krukku af dukkah, góða ólífuolíu og brauð saman, já og jafnvel fallega litla diska með.

Mæli óhikað með þessu :-)

Meira síðar.

Marglitir marengstoppar

2012-01-17T23:48:00.000Z

Þessi er ótrúlega létt og skemmtileg - eitt af því sem rataði í matargjafir til vina þessi jólin :-)

Uppskriftin var eftirfarandi ...
3 stórar eggjahvítur (Takk Hjördís Lára :-)
2 dl + 2 msk flórsykur
1 tsk cream of tartar
1 tsk bragðefni eftir smekk (t.d. vanilla, piparmynta ...)
Matarlitur

Byrjaði á að þeyta saman eggjahvíturnar

og bætti svo cream of tartar út í,

og í kjölfarið sykrinum smátt og smátt

Eggin og sykurinn voru auðvitað stífþeytt

Bætti að lokum út í vanilludropunum

því ég er svo mikill vanilluaðdáandi

Þá dró ég fram sprautupokann minn og galdrarnir hófust.

Hellti einum dropa af grænum matarlit

niður eina "hliðina" innan á pokanum og

einum dropa af bláum matarlit niður hina "hliðina" og

leyfði þeim að leika allaleiðina niður. Setti svo

"marengsdeigið" ofan í sprautupokann líka ...

og sprautaði svo litlum toppum á ofnplötu og

þegar sprautað var komu þessir líka fallegu og litríku

toppar - ekki skemmdi fyrir hvað þeir voru bragðgóðir!

Skellti þeim svo inn í ofn sem stilltur var á 110°C, blástur

og hafði kveikt á ofninum í eina klukkustund, en

þá slökkti ég á ofninum, en hafði kökurnar áfram inn

í ofninum yfir nóttu þannig að þær þornuðu almennilega.

Það er alveg óhætt að mæla með þessum við hvaða tækifæri sem er - bragðgóðir munnbitar og líta svo líka vel út, hvort sem er í munni eða á boði - best er þó hversu yndislega fljótlegir þeir eru - þó þeir þurfi reyndar að vera svolítið lengi inn í ofninum - biðin er þess virði!

Meira síðar.

Eggjakaka með rauðlauk og kartöflum

2012-01-14T13:10:00.001Z

Stundum langar mann bara í eitthvað einfalt, fljótlegt og þægilegt og þessi uppskrift sem mig langar að deila með ykkur í dag er það svo sannarlega - og ekki skemmir fyrir hvað hún er bragðgóð :-)

Uppskriftin varð svona ...
1 rauðlaukur
250 gr kartöflur
6 egg
Salt og pipar
1 msk oreganó
1 tsk þurrkuð basilíka
1/2 krukka fetaostur

Byrjaði á að skera laukinn í tvennt

og svo í þunnar sneiðar

Hitaði ólívuolíu á pönnu og steikti laukinn

þar til hann var mjúkur

Skar hverja kartöflu í fernt,

s.s. ekki of stóra bita

Skellti kartöflunum svo á pönnuna

og hrærði reglulega í til að þær steiktust jafnt

Braut eggin sex í litla skál

Bætti út í skálina salti og pipar,

oreganó og basilíku

Notaði svo gaffal til að þeyta öllu saman.

Hellti eggjablöndunni á pönnuna,

lækkaði um leið hitann í meðalhita,

jafnvel í lægri kantinum því ég vildi ekki brenna neitt

Dreifði svo fetaostinum yfir og svo var bara

að leyfa eggjakökunni að "bakast" í sirka 10-15 mín

- en ef þið eigið pönnu sem má setja inn í ofn,

þá getur verið sniðugt að gera það síðustu mínúturnar.

Að lokum varð til þessi líka snilldareggjakaka

sem ég borðaði einfaldlega með ferskum tómat

sem ég hafði skorið í bita í staðinn fyrir sósu

- bara gott!

Þetta var yndislega einfalt, gott og þægilegt - Sjaldan fengið jafn bragðgóðar kartöflur - Mæli óhrædd með þessu!

Meira síðar.

Villisveppabolognase

2012-01-10T19:53:00.004Z

Í tilefni smá áskorunar sem ég er þátttakandi í þá verður aðeins meira um grænmetisrétti hér næstu þrjár vikurnar en venjulega - spennandi bara að sjá hvort ég haldi þetta út :-)

Ég byrjaði áskorunina í gær á því að elda villisveppa bolognase ... En ég var svo heppin að þegar ég var að afþýða frystinn um daginn þá fann ég einmitt nokkra poka af sveppum sem ég hafði týnt í fyrrasumar og var tilvalið að nota.

Uppskriftin endaði svona ... fyrir tvo

275 gr villisveppir (auðvitað hægt að nota venjulega sveppi líka, þessir eru bara bragðsterkari)

1 laukur

~50 gr smjör

1 hvítlauksgeiri

1 dós niðursoðnir tómatar

1 1/2 msk oreganó

1-2 tsk þurrkuð basilíka

Salt og pipar

Rifinn parmesanostur (þarf ekki en er hrikalega gott)

Spagettí

Átti sveppi í frystinum - setti þá frosna á heita pönnu

Skar laukinn í bita

Skellti pönnunum frostum á pönnuna og steikti

Steikti þá meira að segja upp úr smjöri - namm!

Bætti svo lauknum út á pönnuna líka og steikti með

Spagettíið að sjóða á fullu :-)

Þá var það hvítlauksgeirinn ...

sem ég setti í hvítlaukspressu og á pönnuna

með sveppunum og lauknum

Svo var bara að hella tómötunum út á,

var með dós af söxuðum tómötum

Svo var það oreganó

og basilíkan, salt og pipar.

Leyfði þessu svo að krauma í sirka fimm mínútur.

Svo var bara að skella spagettí á diskinn,

sósu ... og rúsínan í pylsuendanum, ítölskum parmesan.

Þetta reyndist vera alveg hreint fáránlega gott - eignlega algerlega klikkað gott - Svo skemmdi ekki fyrir hversu einfalt, þægilegt og fljótlegt þetta var - það sem tók mestan tíma var að sjóða blessað spagettíið! Fer svo sannarlega í uppáhaldsbókina á þessu heimili :-)

Meira síðar.

Kjúklingur með rauðu heimatilbúnu kurrý og bambus

2012-01-08T23:23:00.000Z

Það er algerlega hollusta og létt mataræði sem hefur verið í gangi eftir jólin og einn af þeim réttum sem hafa verið prófaðir á heimilinu er kjúklingakurrý með rauðu heimatilbúnu kurrý, og það sem mér fannst mest spennandi, með bambus bitum.

Uppskriftin var eftirfarandi ... fyrir 4-6

2 dósir kókosmjólk

~800 gr kjúklingabringur

2 msk thai fiskisósa

1 msk sykur

1 dós bambus bitar

5 kaffir limelauf

Salt og pipar

2 rauð chillí

Nokkur myntulauf

Nokkur basilíkulauf

Rauða kurrýið

12-15 rauð chillí

4 skallottulaukar

2 hvítlauksgeirar

1 msk ferskt engifer

2 sítrónugrasstilkar - eða 1-2 tsk sítrónusafi

3 limelauf

1 tsk kórianderduft

10 svört piparkorn

1 tsk kórianderfræ

1/2 tsk cumin fræ

1/4 tsk kanill

1 tsk turmeric

2 msk matarolía

Byrjaði á að búa til kurrý-ið, chillíið tekið fram

og skorið fyrst í tvennt og notaði teskeið til að

hreinsa innan úr þeim

Voilá, hrein og fín ...

hefði reyndar líklega sjálf sleppt því að hreinsa þau,

en var að fá fjölskylduna í mat og ákvað að

reyna að hafa þetta ekki of sterkt ...

Hreinsaði svo skallottulaukinn og skar í sneiðar

Skellti chillíinu, lauknum og hvítlauknum

í matvinnsluvélina

Skar engiferið og skellti sömuleiðis í matvinnsluvélina

Bætti svo út í sítrónusafanum ...

og limelaufunum, sem ég marði með puttunum

áður en ég setti þau út í

Svo voru það kryddin ... mulinn kóriander ...

Kórianderfræin ...

Cuminfræ ...

Kanill ...

og auðvitað turmeric.

Svo var bara að setja vélina í gang

og hakka allt vel saman

Skellti svo olíunni út í og hakkaði enn betur

eða þar til þetta var farið að líkjast kurrý :-)

Þá var að skera kjúklinginn í bita

Setti helminginn af kókosmjólkinni á pönnuna,

notaði djúpa pönnu, og leyfði suðunni að koma upp

Þegar þetta hafði soðið í nokkra stund - passið að hræra

reglulega í - þá bætti ég 2 msk af kurrýinu út í

(setti restina í krukku og inn í ískáp til að nota síðar)

og hrærði saman við kókosmjólkina.

Bætti svo kjúklingnum út í, ásamt fiskisósunni og sykrinum

og leyfði kjúklingnum svo að eldast í nokkrar mínútur.

Hellti vatninu af bambus bitunum

og skellti þeim svo út í pönnuna

ásamt chillíinu, kaffir limelaufunum og

restinni af kókosmjólkinni

Hrærði öllu vel saman og leyfði suðunni að

koma aftur upp.

Skar svo myntulauf og basillauf

og setti út á pönnuna eftir að hafa fullvissað mig

um að kjúklingurinn væri tilbúinn með þvi

að grípa einn bita og skera hann í tvennt.

Svo var bara að bera þetta fram með hrísgrjónum

og auðvitað naanbrauði :-)

En þá er það spurningin, var þetta gott? Sko, mér fannst þetta rosalega gott og þetta var mjög gott í pönnunni, eiginlega svakalega gott! Hins vegar varð þetta undarlega bragðlítið þegar ég borðaði þetta með hrísgrjónunum - en mig grunar að þau hafi verið of vatnsmikil, þ.e. of blaut - og þ.a.l. útþynntu þau svolítið bragðið. Þannig að ég mæli með að passa það með hrísgrjóninn að þau séu ekki of blaut og ég ætla sömuleiðis næst að setja aðeins meira af chillí í réttinn sjálfan, en að þessu gefnu þá var þetta virkilega góður réttur og hann var étinn upp til agna.

Meira síðar.

Steinbítur í kókossósu

2012-01-05T20:16:00.002Z

Eins og áður hefur komið fram þá erum við fiskur ekkert sérstaklega góðir vinir - reyndar verð ég bara veik af fisk, en það er önnur saga. Það sem ég ætla að deila með ykkur í dag er steinbítur í kókossósu, en ég var svo heppin að fá gefins steinbít frá frábærum vinum - er enn hálf orðlaus :-)

Nema hvað, eftir nokkrar vangaveltur ákvað ég að elda hann í kókossósu ...

Uppskriftin var eftirfarandi ...

1 1/2 kg steinbítur

12 skallottulaukar

1 tsk salt

1/2 dl kókosmjöl

12 afhýddar möndlur

6 hvítlauksrif

~5 cm fersk engiferrót

1 tsk sítrónupipar

4 tsk turmeric

6 msk matarolía

2x400 ml kókosmjólk (ég notaði 3,5x400 ... alltof mikið)

4-6 rauð chillí

Salt og pipar

Hrísgrjón

Steinbíturinn var roðhreinsaður

og skorinn í bita

Dreifði svo vel úr honum og sáldraði sjávarsalti yfir,

setti svo til hliðar meðan ég undirbjó sósuna

Byrjaði á að setja skallottulauinn í matvinnsluvélina,

ásamt möndlum og hvítlauk,

og engifer og hakkaði vel.

Bætti svo turmeric út í og saxaði enn betur.

Skellti svo laukblöndunni á pönnunni, ásamt

matarolíu og steikti í nokkrar mínútur.

Svo hellti ég kókosmjólkinni út í (sem eins og

kemur fram í uppskriftinni að ofan hefði mátt

vera helmingi minni) og leyfði

suðunni að koma upp og malla í smá stund.

Skar svo chillíið í bita og setti til hliðar.

Setti þá fiskinn út í sósuna og leyfði að

sjóða í 3-4 mínútur (má ekki sjóða of lengi)

Skellti þá smá kókosmjöli út í

og chillí-inu og leyfði að sjóða í 2 mínútur í viðbót.

Að lokum var bara að bera matinn fram með hrísgrjónum.

Þessi réttur fékk mjög góða dóma, þó hitinn í lambinu hafi nú örlítið stolið senunni þetta kvöldið, en helsta umkvörtunarefnið var að chillíið kæmi ekki alveg nógu sterkt í gegn - en ég hugsa að ef maður bætir við einu chillí og minnki kókosmjólkina þá yrði þetta fullkomið :-)

Meira síðar.

Cajun kartöflusalat

2012-01-02T21:56:00.001Z

Í staðinn fyrir að taka næsta aðalrétt ákvað ég að taka fyrst meðlætið, sem var Cajun kartöflusalat. Það reyndist vera eiginlega alveg fáránlega gott. Reyndar svo gott að ég er byrjuð að sjóða kartöflur í salat til að taka með sem hádegismat í vinnuna í morgun :-) Það var yndislega einfalt að gera það, fyrir utan vesenið sem fylgir því að afhýða kartöflurnar, og namm hvað það var bragðgott!

Uppskriftin var eftirfarandi ... meðlæti fyrir 6-8
8 meðalstórar kartöflur
1 græn paprika
1 stór súrsuð smágúrka (gherkin)
4 vorlaukar
3 egg, harðsoðin
250 ml mæjónes
1 msk hot dog relish eða dijon sinnep
Nokkrir dropar tabasco sósa
1/4 tsk ceyenne pipar
Salt og pipar

Byrjaði á að sjóða kartöflurnar í sirka 20 mínútur

Svo var bara að afhýða þær og skera í munnbita

Skar svo paprikuna í frekar smáa bita

Skellti kartöfunum og paprikunni í stóra skál

Svo var það gherkinið eða smá gúrkan

Skar hana líka í litla bita eins og paprikuna

Þá voru það vorlaukarnir

Skar þá í sneiðar ... setti þetta allt í skálina með

paprikunni og kartöflunum.

Þá tók ég fram litla skál og skellti í hana mæjónesinu,

hot dog relish-inu, cayenne piparnum, sjávarsalti,

og auðvitað svörtum pipar

Hrærði þessu öllu saman.

Þá var bara að sjóða eggin í 12 mínútur,

kæla og taka skurnina utan af og skera í bita

og skella þeim út í skálina sömuleiðis.

Eins og glöggir lesendur taka eftir þá neyddist ég

til að skipta um skál þar sem sú fyrri hafði reynst

einum of smá.

Skellti sósunni yfir

Blandaði öllu vel saman og skellti smá cayenne pipar yfir.

Þetta er algerlega nýtt uppáhaldsmeðlæti og eftir morgundaginn verður þetta alveg örugglega sömuleiðis nýr uppáhaldshádegismatur - Mæli óhikað með þessu.

Meira síðar.

Eldlamb

2012-01-01T21:12:00.000Z

Þetta nú síðastliðna ár leið alveg hreint ótrúlega hratt! Fullt af skemmtilegum matarboðum og alls 138 blogg!

En að efni þessa bloggs, en í tilefni af síðasta föstudegi ársins bauð ég nokkrum góðum vinum í mat.

Jólagjöfin frá mér til mín í ár var auðvitað uppskriftabók sem heitir Red Hot! enda er ég einlægur aðdáandi bragðsterks matar og finnst eiginlega allra verst hvað það er erfitt að fá mismunandi tegundir af chillíum á Íslandi.

Nema hvað, fyrir þetta matarboð urðu fjórar uppskriftir fyrir valinu - gulrótarídýfa í forrétt með tortillaflögum, í aðalrétt var steinbítur í kókossósu og eldlamb, og meðlæti var Cajun kartöflusalat. Í eftirrétt voru nú bara smákökur og ostar og chillíhlaup. Steinbíturinn átti nú að vera aðalrétturinn, og kjötið bara svona auka fyrir mig sem er með fiskóþol en eins og oft vill verða þá sló "aukarétturinn" í gegn og þess vegna ákvað ég að byrja á að deila honum með ykkur enda var hann alveg hrikalega góður (þó ég segi sjálf frá) og mér finnst rétt að byrja árið á hápunkti :-)

Uppskriftin endaði svona ... athugið að kjötið þarf að marenerast í a.m.k. 1 klst

800 gr lambainnlæri

420 ml grísk jógúrt

3/4 möluð kardimomma sem ég átti ekki þannig að ég notaði 2 kardimommufræ, opnaði þau og reyndi að mylja fræin inní og notaði þau.

3,5 tsk rifið ferskt engifer

4-5 hvítlauksrif

3,5 tsk sterkt chillíduft

3,5 tsk garam masala

3,5 tsk salt

3,5 msk matarolía

6 laukar

3 lárviðarlauf

900 ml vatn

4-6 rauð chillí

6 græn chillí

Tók lambainnlærin og skar í þunnar litlar ræmur

Sjá hér - hver biti var u.þ.b. 7,5 cm á lengd,

setti kjötið svo til hliðar á meðan ég bjó til mareneringuna

Tók fram stóra skál og skellti jógúrtinu í

ásamt kardimommunum,

lenti í smá vandræðum með að mala þær :-)

Svo var bara að bæta út í rifnu engiferinu ...

rifnum hvítlauknum ...

chillíduftinu og garam masala ...

og auðvitað saltinu - salt er ótrúlega mikilvægt :-)

Svo var bara að þeyta þessu öllu saman, vel og vandlega

og setja kjötið út í ...

og nudda mareneringunni vel utan um kjötið -

Svo var bara að setja plast yfir og setja skálina í kæli

í a.m.k. klukkustund, hugsa þetta hafi fengið að

marenerast í sirka tvo tíma hjá mér.

Svo var bara að byrja að elda - fyrst að skera laukinn

og skella olíu í pönnu og steikja laukinn þar til hann

var orðinn mjúkur og að verða gullinn.

Svo út af því að ég þurfti að nota pönnuna í annað,

þá skellti ég steiktum lauknum í stóran pott ásamt

lárviðarlaufunum, setti á lágan hita ...

og byrjaði svo að steikja kjötið í pönnunni,

en ég steikti kjötið í tveimur skömmtum til að það

fengi sem sneggsta og jafnasta steikingu. En ég

bara rétt brúnaði kjötið í pönnunni.

Svo var bara að skella kjötinu eftir því sem það

steiktist í pottinn ásamt lauknum.

Þegar kjötið var allt steikt og komið í pottinn

hellti ég vatninu yfir og svo var bara að leyfa þessu

að malla í 20-30 mínútur. Ég var með lokið á

til að byrja með en tók það af eftir sirka 15 mínútur

og hækkaði aðeins hitann til að minnka sósuna.

Það má einnig hafa lokið af allan tímann og hafa þá

litla eða nánast enga sósu eftir, eiginlega bara

smekksatriði, en mér líkar vel við sósur með hrísgrjónum.

Á meðan var svo bara að hreinsa skera

chillíin í mjóa renninga.

Svo þegar kjötið var að verða tilbúið bætti ég chillíinu

út í pottinn og leyfði að malla í sirka 2-3 mínútur.

Skellti þessu svo í stóra skál og bar fram ásamt

hrísgrjónum, brauði og kartöflusalati.

Þetta var eiginlega alveg rosalega góður réttur og fékk mjög góða dóma þarna um kvöldið en flestum þótti hann skara framúr. Hann reif svolítið í, en samt ekki þannig að það væri óþægilegt. Sem dæmi um hversu góður hann var þá hringdi einn matargestanna strax morguninn eftir til að fá uppskriftina! Held maður fái varla betri meðmæli en það :-)

Gleðilegt nýtt (matar)ár!

Meira síðar.

Karamellusósa fyrir hátíðarnar

2011-12-28T00:01:00.002Z

Í jólaannríkinu þá fór alltof lítið fyrir bloggum og ég meira að segja gleymdi að segja "Gleðileg jól til ykkar allra nær og fjær" en bæti úr því núna :-)

Jólagjafirnar í ár voru nánast allar matarkynns, ég útbjó mandarínukassa sem ég spreyjaði fallega á litinn, skellti kreppappír í botninn og setti ýmislegt heimagert í kassana, misjafnt var hvað fór í hvern en allir áttu þeir sameiginlegt að hafa núggat, marengstoppa og dukkah. Þá fór í nokkra kassa heimagerð karamellusósa, ætlaði að setja í alla en þetta reyndist aðeins meiri þolinmæðisvinna en ég átti von á, auk þess sem krukkurnar kláruðust :-/ Fannst það nú hálf leiðinlegt verð ég að viðurkenna, því þessi sósa reyndist alveg svakalega góð, virkilega góð reyndar. En ég deili henni með ykkur hér og nú í þeirri von að allir geti prófað.

Sósan er alveg ekta með möndlugrautnum, ísnum og jafnvel kökum og hefur svona ofsalega ríkt og djúpt karamellubragð, get eiginlega varla lýst því með orðum.

Uppskriftin var eftirfarandi ...
3 dl sykur
1 dl vatn
2 dl rjómi
1 tsk vanilludropar
1/2 tsk sjávarsalt

Skellti sykrinum og vatninu í djúpa pönnu

og stillti á meðalhita - athugið að að hræra bara

létt í pönnunni áður en ég kveikti undir en svo

má ekkert hræra í aftur fyrr en rjómanum

hefur verið bætt út í, hins vegar má hreyfa

pönnuna til að hreyfa vökvann til.

Á meðan hitinn steig í pönnunni setti ég rjómann í

mælikönnu

og bætti út í vanilludropunum

og saltinu og notaði gaffal til að hræra saman,

setti svo til hliðar.

Fyrst byrjaði að sjóða ...

og það sauð alveg vel og lengi án þess að nokkuð gerðist

Svo eftir sirka korter byrjaði að koma litur á sykurinn,

á þessum tímapunkti reyndi ég að vera dugleg

að hreyfa pönnuna til að reyna að blanda þessu aðeins

Að lokum var kominn nokkuð fallegur litur á sykurinn

og tími var kominn til að hella rjómanum saman við,

byrjaði á að taka pönnuna af heitu plötunni og

hellti svo rjómanum út í ...

passið ykkur - karamellan er heit og rjóminn kaldur

= það getur skvest

Svo þarf maður að vera alveg sæmilega snöggur

að blanda þessu saman til að rjóminn og karamellan

blandist almennilega saman, ég setti pönnuna aftur

á heitu plötuna til að það væri auðveldara, en

slökkti samt sem áður undir - eða því sem næst,

setti á hálfan til að byrja með og slökkti svo alveg fljótlega.

Úr varð þessi fallega karamella sem ég hellti svo í

krukkur og gaf ásamt litlum skeiðum :-)

Ég mæli óhikað með þessari uppskrift. Ég hafði smá efasemdir um það að mega ekkert hræra en það kom svona líka vel út og bragðið, nammi namm - ótrúlega gott karamellubragð - mæli með þessari fyrir alla sanna karamelluaðdáendur.

Meira síðar.

Litlar ostakökur

2011-12-16T22:06:00.001Z

Ég ætla að byrja þetta blogg á að viðurkenna að ég hef eiginlega toppað sjálfa mig með þessum litlu ostakökum, þær eru sem sagt svo góðar!

Ég var venju samkvæmt öööörlítið stressuð, enda aldrei bakað ostaköku, hvað þá ostakökur í muffinsformum :-)

Uppskriftin var eftirfarandi ... gefur ~30 kökur
1 pakki graham's crackers
8 msk sykur
113 gr smjör
30 súkkulaðibitar, ég notaði karamellufyllt súkkulaði
900 gr rjómaostur
4 dl sykur
1 dl hveiti
2 tsk vanilludropar
2 egg

Byrjaði á að skella kexinu í matvinnsluvélina

og malaði það fínt

Alveg eins og það á að vera :-)

Bræddi svo smjörið

Bætti sykrinum (8 msk) saman við kexið

og hellti svo bræddu smjörinu yfir

Svo var bara að nota skeið til að blanda þessu vel saman.

Setti svo sirka eina til eina og hálfa matskeið

af kexblöndunni í hvert muffinsform

Svo notaði ég einfaldlega desilítramál til að

þrýsta kexinu niður og mynda botn

Setti svo einn súkkulaðimola í miðjuna á hverju fomri

Þar sme ég hafði stolist til að borða þrjú karamellu-

súkkulkaði þá varð ég að draga fram marsmola

til að bæta upp það sem vantaði :-)

Þá var það fyllingin ... skellti rjómaostinum í skál

og þeytti hann vel með handþeytara

Bætti svo út í hveiti, sykri,

og vanilludropum og þeytti vel saman

Svo var bara að bæta eggjunum út í, einu í einu

og þeyta vel á milli

Svona leit þetta út að lokum

Svo setti ég sirka 2 msk af ostafyllingu í hvert form

Skellti þessu svo inn í 180°C heitan ofn í 20 mín

og út komu þessar fallegu ostakökur.

Ég verð að viðurkenna að þær komu betur út en ég hefði nokkurn tíma geta hugsað mér, hafði til dæmis áhyggjur af því að þær væru ekki nógu vel bakaðar en það reyndist ástæðulaus ótti. Áferðin var silkimjúk og bragðið enn betra! Bæjarfulltrúar Ísafjarðarbæjar gáfu þeim 9,5 - held meiri meðmæli séu varla til :-)

Meira síðar.

Jólasmákökur 2011: Bananasmákökur

2011-12-14T18:42:00.000Z

Prófaði þessar líka skemmtilegu smákökur um daginn. Ég er hrifin af bönunum og enn hrifnari af kanil þannig að það var augljóst mál að prófa þessa uppskrift.

Uppskriftin var eftirfarandi ...

160 ml fita (t.d. mjúkt smjör)

3 1/2 dl sykur

1 tsk vanilludropar

2 egg

1 banani

4 1/2 dl hveiti

2 tsk lyftiduft

1/4 tsk salt

1 poki möndlur, hakkaðar

1/2 tsk kanill

Byrjaði á að stappa bananann og

setti svo til hliðar

Skellti svo í skál fitu (t.d. smjöri) og sykri

og vanilludropum og hrærði vel saman

Bætti svo eggjunum saman við

og hrærði enn meira

Svo var bara að bæta við banananum

og hræra saman við

og að lokum þurrefnunum, hveiti, matarsóda,

salti ...

og svo auðvitað hnetunum.

Hrærði öllu saman þannig að úr varð

þetta líka hrikalega bragðgóða deig

(er ein af þeim sem smakkar alltaf deigið :-)

Notaði svo teskeið til að móta hálfgerðar kúlur

og setti á ofnplötu

Blandaði svo saman kanil og sykri og stráði yfir

hverja og eina köku. Skellti þeim svo inn í ofn

í 8-10 mínútur við 200°C.

Út komu þessar líka bragðgóðu og skemmtilegu kökur,

að minnsta kosti fyrir þá sem fíla bananabragðið.

Mæli alveg með þessum, eins og einn sagði, það er svona ömmubragð af þessum smákökum :-)

Meira síðar.

Jólasmákökur 2011: Mokkatoppar

2011-12-12T22:02:00.001Z

Þar sem ég er einlægur kaffiaðdáandi þá kom auðvitað ekki til greina að gera bara eina tegund af kaffikökum fyrir þessi jól. Það var því ákveðið að smella í mokkatoppa ... sem reyndust alveg hreint hættulega góðir!

Uppskriftin var eftirfarandi ...

1 tsk vanilludropar

1 tsk skyndikaffi (ég notaði neskaffi)

3 eggjahvítur

1/4 tsk cream of tartar

170 ml sykur

3 msk kakó

1 dl saxað súkkulaði

Byrjaði á að setja vanilludropa í skál ásamt kaffinu

og blanda vel saman þannig að kaffið leystist upp,

setti svo til hliðar meðan ég þeytti marengs

Setti eggjahvítur í skál

og bætti cream of tartar út í

og svo var bara að þeyta ...

þangað til þetta var orðið vel froðukennt

og þá var bara að bæta sykrinum út í smátt og smátt

og þeyta vel og vandlega

eða þar til úr varð þetta líka stífa og fína deig

Þá var að draga fram sigtið og kakóið

og sigta kakóið yfir

og nota svo trésleif til að blanda kakóinu

varlega saman við deigið

og svo súkkulaðibitunum

og svo að lokum vanilludropakaffinu

Hrærði öllu varlega saman með sleifinni

Notaði svo matskeið til að búa til kökur á ofnplötuna,

eftir á að hyggja þá hefði ég betur notað teskeið

en þær urðu svolítið stórar ... og færri fyrir vikið ...

en það er svo sem ekkert endilega verra

Skellti þeim svo inn í ofn í 1 klst við 120°C,

slökkti þá á ofninum og hálfopnaði hann en

lét kökurnar vera inni í hálftíma í viðbót áður en

ég tók þær endanlega út.

Sumsé hrikalega bragðgóðar, en auðvitað mjög sætar kökur sem óhætt er að mæla með!

Meira síðar.

Jólasmákökur 2011: Hlaupkökur

2011-12-10T14:19:00.001Z

Þessi uppskrift er svolítið öðruvísi en margar aðrar smákökuuppskriftir sem ég hef smakkað að því leiti til að fyllingin er ávaxtahlaup, þið vitið nammihlaup! Mér fannst þetta hljóma svo skemmtilega að ég hreinlega varð að prófa :-)

Uppskriftin er eftirfarandi ...

2 dl fita (t.d. 226 gr smjör, mjúkt)

2 dl púðursykur

2 dl sykur

2 egg

1 tsk vanilludropar

1/4 tsk salt

1 tsk matarsódi

1 tsk lyftiduft

4 dl hveiti

4 dl haframjöl

2x100 gr pokar sykrað hlaup

1x100 gr poki möndlur, hakkaðar

Þetta var yndislega einfalt, byrjaði á að

setja í skálina fituna, báðar tegundir sykurs og eggin

Þeytti þessu öllu vel saman

Svo var bara að bæta saman við öllum þurrefnunum

og þeyta saman við.

að lokum var það svo hlaupið

og möndlurnar ...

Hræra öllu saman

og notaði svo teskeið til að búa til kúlur og

raðaði upp á ofnplötu

Skellti þeim svo inn í 180°C heitan ofn í sirka 10 mín.

Svo var bara að leyfa þeim aðeins að kólna

áður en ég tók þær af plötunni,

passið ykkur hlaupið verður fáránlega heitt!

Til urðu þessar fínustu smákökur!

Þessar eru alveg svolítið exótískar og hafa fengið mismunandi dóma, annað hvort hefur fólk elskað þær eða alls ekki þolað þær. Persónulega fannst mér þær fínar og koma alveg sterkar inn í jólabaksturinn.

Meira síðar.

Jólasmákökur 2011: Himnakökur

2011-12-09T11:13:00.001Z

Þessar eru svo sannarlega himneskar! Þrjár mismunandi súkkulaðitegundir og daim, gæti nokkuð verið betra?? Ég viðurkenni að ég hafði nokkrar efasemdir um þetta þar sem að mér fannst vera svo rosalega mikið af súkkulaði, en namm hvað þetta kom vel út!

Uppskriftin var eftirfarandi ...
2 dl smjör
5 dl flórsykur
2 egg
2 tsk vanilludropar
5 dl hveiti
1 tsk matarsódi
1 tsk salt
1 dl hvítir súkkulaðidropar
1 1/2 dl ljósir súkkulaðidropar
1 1/2 dl dökkir súkkulaðidropar
20 lítil daim, hökkuð

Byrjaði á að skera smjörið í bita og setja í skál

Svo varð að bæta út í flórsykrinum ...

eggjunum ...

vanilludropunum ... og hræra öllu vel saman

Þá var bara að blanda þurrefnunum út í

og hnoða öllu saman.

Þá var að hakka daimið

Vel hakkað

og bæta því út í deigið, ásamt súkkulaðinu ...

og restinni af súkkulaðinu ...

og hnoða þessu öllu inn í deigið.

Svo var bara að nota matskeið til að koma deiginu

á ofnplötuna ... þarna vöknuðu miklar

efasemdir um verkefnið - að það yrði ekki

bara bráðið súkkulaði út um alla plötuna :-)

Skellti kökunum svo inn í ofn við 180°C

í sirka 12-13 mínútur og út komu þessar fínu kökur

Nammi namm hvað þær voru hrikalega góðar!

Mæli eindregið með þessum fyrir alla súkkulaðiaðdáendur! Einfalt að gera þær líka og enn einfaldara og skemmtilegra að borða þær.

Meira síðar.

Jólasmákökur 2011: Espressó kökur

2011-12-09T09:38:00.001Z

Þá er komið að þeirri uppskrift sem svo sannarlega hefur slegið í gegn hjá þeim sem hafa fengið að smakka, raunar er þetta sú uppskrift sem flestir hafa sagt vera besta, þ.e. hjá þeim sem hafa fengið að smakka allar kökurnar :-) Ég verð reyndar að viðurkenna að þær eru rosalega góðar!

Uppskriftin er eftirfarandi ...
113 gr smjör, mjúkt
1 dl fita - ég notaði Crisco fitu sem ég fékk í Kosti, bara því mig langaði að prófa það, þetta reyndist vera hin mesta snilld og alveg fáránlega einfalt að nota. Hins vegar ef maður á ekki eina slíka þá er hægt að nota meira smjör, 1 dl = 113 gr.
1/2 dl sykur
175 ml sykur
2 egg
1 tsk vanilludropar
4 1/2 dl hveiti
1 tsk matarsódi
1 tsk salt
1/2 tsk kanill
1 100 gr poki möndlur
100 gr súkkulaðihúðaðar kaffibaunir
20 lítil daim, hökkuð

Byrjaði á að setja í skál mjúkt smjör, skorið í bita

Þetta er umrædd Crisco fita :-)

Skellti henni í skálina líka, setti skálina

svo til hliðar

Byrjaði á að hakka daim-ið og kaffibaunirnar

og svo út af því að ég átti ekki hakkaðar möndlur

þá var lítið annað að gera en að hakka þær slíka :-)

Mikið finnst mér möndlur góðar!

Svo var að þeyta saman smjörið og fituna,

vel og vandlega

Bætti svo sykrinum við og þeytti saman við

og púðursykrinum og þeytti enn betur

Svo var að bæta eggjunum út í

og vanilludropunum og þeyta öllu saman.

Þá var ekkert annað að gera en að bæta við

þurrefnunum: hveiti, matarsóda, salt og kanill

Á þessum tímapunkti réð handþeytarinn ekki lengur

við deigið og það var bara þetta gamla góða = sleifin

Svo var að bæta út í súkkulaðihúðu kaffibaunirnar,

möndlurnar og daiminu

og blanda öllu vel og vandlega saman.

Svo var bara að nota teskeið til að setja deig á plötuna

og skella plötunni inn í 180°C heitann ofn í sirka 10 mín.

Út komu þessar líka fullkomnu kökur :-)

Þessar eru svo sannarlega hrikalega góðar og ég mæli óhikað með þeim. Eina sem mér finnst "leiðinlegt" við þessa uppskrift er hvað súkkulaðihúðu kaffibaunirnar eru eiginlega kjánalega dýrar en einn pinku lítill kassi (100 gr) kosta 409 kr. Nema hvað, foreldrar mínir voru í Reykjavík og ég bað þau að hafa augun opin ef þau sæu slíkar baunir í borginni. Í Hagkaup var ungur strákur að vinna (sagði mamma) og hún spurði hann um súkkulaðihúðaðar kaffibaunir - þar var auðvitað bara til það sama og hér, rándýrar baunir. En þá sagði strákurinn, "hey, af hverju býrðu þær ekki bara til sjálf?" og dró fram espressóbaunir og súkkulaðihjúp. Það er einmitt það sem ég ætla að gera fyrir næstu umferð - ekki spurning - alger snilldar hugmynd hjá drengnum, að mér hafi ekki dottið það í hug strax! Sú uppskrift kemur síðar, byrjið á að njóta þessarar!

Meira síðar.

Jólasmákökur 2011: Þegar "pipar"kökur bakast ...

2011-12-07T09:56:00.001Z

Þá er aðgerðin "Jólabaksturinn mikli 2011" hafin! Hófst hún með bakstri fjögurra mismunandi tegunda sem mér fannst hver annarri meira spennandi. Þetta var algerlega yndislegur tími í gærkvöldi, hlustaði á Rás 2 og bakaði - alger hugleiðsla í leiðinni :-)

Nema hvað, fyrsta tegundin sem mig langar að deila með ykkur eru piparkökur, með áherslu á PIPAR :-) Þær eru hrikalega góðar, einu kryddin eru sem sagt svartur pipar og svo kanill og það kemur alveg hreint yndislegt eftirbragð.

Uppskriftin var eftirfarandi:

170 gr smjör, mjúkt

180 ml sykur

1 egg

1/2 dl sýróp

4 dl hveiti

2 tsk matarsódi

1 tsk kanill

1/2 tsk salt

1 1/2 tsk svartur pipar, grófmalaður

Til skreytingar: sykur eða litaður sykur

Svo var þetta eiginlega alveg yndislega létt.

Byrjaði á að setja sykur og smjör í skál

og þeyta vel saman

Bætti svo sýrópinu ...

og egginu út í ...

og þeytti enn betur saman.

Svo var bara að hella restinni (þurrefnunum) út í

og hræra enn aftur öllu saman ...

Verð að viðurkenna að þarna á þessum tímapunkti

langaði mig alveg ogguponsu að eiga Kitchen Aid :-)

þannig að úr varð þetta fína deig!

Svo var bara að setja strásykur á disk

og búa til litlar kúlur úr deiginu og rúlla

upp úr sykrinum. Bölvaði því smá þarna

að ég væri ekki búin að prófa að búa til

litaðan sykur ... er á listanum fyrir kvöldið ...

En mundi þá að ég átti þennan fína skrautsykur

upp í skáp og bætti honum á diskinn ásamt strásykrinum

Setti svo kúlurnar á bökunarplötu,

athugið að það þarf að hafa smá bil á milli

því þær fletjast aðeins út í bakstri

Séð ofan frá ...

og út komu þessar líka fínu og flottu piparkökur

eftir að hafa verið bakaðar í 12-15 mínútur

við 180°C hita, blástur.

Mér finnst þessar alveg hrikalega góðar! Ég fór með allar fjórar sortir í vinnuna og þessar fengu alveg fína dóma, en sérstaklega fannst fólki skemmtilegt hvernig piparbragðið kom einhvernveginn eftir á, eins og svona bragðsprengja eiginlega. Þessar voru nú samt ekki að fá bestu dómana, hlaupkökurnar og espressókökurnar áttu nú eiginlega vinninginn en þær koma inn fljótlega sömuleiðis. Þessar fengu nú samt sem áður mjög góða dóma og þær eru alveg í uppáhaldi hjá mér (ásamt hinum reyndar líka :-)

Meira síðar.

"Sterk" súkkulaðikaka með cayenne pipar

2011-12-03T09:49:00.001Z

Mig hafði lengi langað til að prófa súkkulaðiköku með cayenne pipar - finnst eitthvað svo ótrúlega sniðugt við hugmyndina. Það var því tilvalið að prófa hana í saumaklúbb um daginn.

Uppskriftin var eftirfarandi ...

1/2 dl kakó

2 dl hveiti

1/2 tsk salt

1/2 tsk lyftiduft

1/4 tsk kanill

1/4 tsk cayenne pipar

220 gr suðusúkkulaði

1 dl smjör

4 stór egg

1 dl sykur

75 ml púðursykur

1 tsk vanilludropar

Byrjaði á að smyrja formið, setti smjörpappír í botninn

og stráði smá kakói yfir

Svo var að blanda saman þurrefnunum,

hveiti, kakó, lyftiduft, kanill, cayenne pipar og salt

Sigtaði þurrefnin saman i skál og setti til hliðar.

Þá tók ég fram lítinn pott og setti í

hann smjörið og súkkulaðið

Bræddi þetta saman við lágan hita og setti til hliðar

Þá var að taka fram aðra skál og brjóta egginn í hana,

og skellti sykrinum út í

sem og púðursykrinum ...

og svo var bara að þeyta vel og vandlega saman

eða þar til "létt og ljóst"

Þá hellti ég súkkulaðinu saman við

og hrærði saman

vanilludroparnir ... uppáhaldið mitt :-)

og svo að lokum þurrefnin og blanda öllu saman

Svo var bara að skella deiginu í formið

og skella inn í ofn við 180°C í sirka 30-40 mínútur

Voilá, létt að snerta og lítur bara vel út

... svona fyrir utan sprungurnar :-)

Svona leit hún svo út eftir að hafa verið hvolfað.

Ég hefði svo viljað skreyta hana létt með súkkulaðiglassúr eða einhverju slíku, en hafði svo ekki tíma þannig að hún var einfaldlega borin fram með rjóma. Hún var alveg ágæt sko, en miðað við hinar kræsingarnar féll þessi einfalda súkkulaðikaka svolítið í skuggan af hinu verð ég að viðurkenna ... En gaman af henni samt sem áður :-)

Meira síðar.

Brussel og Róm

2011-12-01T22:33:00.001Z

Tók nokkrar matarmyndir á ferð minni um Brussel og Róm - Fórum á þennan líka geggjaða ítalska veitingastað í Brussel, eiginlega einna allra besti matur sem ég hef nokkurn tíma smakkað sem við fengum þar. Ef þið eigið leið um þá borg þá mæli ég með veitingastaðnum "Dolce Amaro" - Svo ru líka nokkrar myndir af matarmarkað sem ég fór á með Judith vinkonu minni í Róm, eeeelska matarmarkaði, skil stundum ekkert í því að ég skuli búa einhversstaðar á norðurhjaraveraldar þar sem eru svo sannarlega engir slíkir markaðir! En það gerir það líklega þess mun skemmtilegra að heimsækja þá þegar maður er í útlöndum :-)

Kjötbolla í forrétt

Brauð :-)

Þarf að spyrja Judith aftur hvað það heitir,

hrikalega gott!

Grillað eggaldinn og mmmm... mozzarella

Beef tartar með trufflum

Trufflu ravioli - hrikalega gott!

Steikt villisvín

Panna cotta

Espresso! Var ég búin að nefna að Ítalía

skemmdi eiginlega algerlega kaffidrykkjuna mína?

og auðvitað limoncello að lokum

Nammi namm :-)

Kvöldið eftir fórum við svo á ekta brusselískt brasserí

og fengum eiginlega alveg vonlausan mat, satt best að

segja ... kjötið var svo blóðugt að það var enn á lífi

og þjónustan var gjörsamlega vonlaus ...

En þeir bættu það aðeins upp með alveg hreint

klikkað góðum eftirrétt ... Belgarnir kunna á súkkulaðið!

Hér erum við svo komin til Rómar, á matarmarkaðinn,

Vildi óska að við gætum keypt krydd svona hér :-)

Það var ekkert lítið úrvalið þarna, langaði helst

að kaupa allt en endaði svo á að kaupa ekki neitt

... nema krydd :-)

Sumt var furðulegra en annað :-)

Ítalirnir elska sitt grappa

Mér fannst bara svo gaman

að þeir voru með grappa

sem heitir Berta :-)

Ný uppskrift og fleira skemmtilegt annað kvöld! Er annars í vandræðum með að hefja baksturinn, get ekki valið úr uppskriftunum :-) En það er a.m.k. komið á listann að prófa að gera eggjapúns, eggjapúns kökur, vöfflukökur, klemmukökur, karamellur og fleira ... nammi namm hvað ég hlakka til jólanna!

Meira síðar.

Kókosdahl

2011-11-28T09:08:00.001Z

Það er fátt skemmtilegra en að halda saumaklúbb, nema þá kannski að fara í saumaklúbb :-) Fyrir svona matarnörda eins og mig þá er það líka tilvalið tækifæri til að prófa nýjar uppskriftir og það gerði ég svo hressilega í síðasta saumaklúbb að ég er enn að vinna í að koma uppskriftunum hingað út á bloggið!

Ein sú uppskrift sem líklega sló mest í gegn er þessi sem ég ætla að deila með ykkur og ég verð að viðurkenna að hún var hrikalega rosalega góð!

Uppskriftin var eftirfarandi ...
5 cm engiferrót
1 laukur
2 hvítlauksgeirar
2 rauð chillí
2 msk matarolía
1 tsk cumin fræ
150 gr rauðar linsubaunir
250 ml vatn
1 msk sterkt karrýmauk
200 ml kókosmjólk
Safi úr einni sítrónu
Búnt af kóriander (átti ekki kóriander, en notaði 2 tsk malaðan í staðinn, kom vel út)
1/2 dl möndluflögur
Salt og pipar

Byrjaði með sirka 5 cm bút af engifer,

Skar engiferið í litla bita ásamt lauknu

og auðvitað hvítlauknum

og nammi namm, chillí - Allt skorið smátt

Skellti svo ólífuolíu í pönnuna og skellti öllu út í,

svo cumin fræjum

og hellti svo vatninu út í. Þarna átti ég að setja

karrýmaukið út í en gleymdi því ... setti það út í

síðar, reyndist ekki koma að sök

og svo linsubaunirnar.

Leyfði suðunni að koma upp, lækkaði svo hitann

og leyfði að krauma í 15-20 mínútur,

hrærði reglulega.

Svo var að hella út í allri kókosmjólkinni, utan 2 msk

og leyfa að krauma aftur í 15-20 mínútur

Þá slökkti ég hitann undir pönnunni og hellti

sítrónusafanum út í -

á sama tíma fattaði ég að ég hafði gleymt karrýinu

og bætti því út í :-)

Jammí hvað þetta var girnilegt

Svo var bara að skella þessu í skál,

hellti svo möndluflögunum yfir

og svo restinni af kókosmjólkinni.

Þetta bar ég svo fram með naan brauði og ég verð að viðurkenna að þetta er algerlega nýr uppáhaldsréttur, bæði var hann með því bragðbetra sem ég hef smakkað og svo er þetta líka alveg hrikalega hollt!

Þið getið ekki annað en elskað þennan :-)

Meira síðar.

Fennel pasta

2011-11-23T17:34:00.001Z

Það er stanslaus tilraunastarfsemi í gangi hér á heimilinu sem fyrir daginn. Nýlega prófaði ég að nýju að búa til pasta, í þetta skiptið bæði venjulegt tagliatelle og svo gulrótar tagliatelle, hvort um sig virkilega gott! Mér varð hugsað til konu sem sat við hliðina á mér í fluginu til Rómar um daginn, en hún sagði mér frá því að mamma hennar byggi til pasta á hverjum degi - finnst það kannski óþarflega mikil vinna, en raunar er það minna mál en maður ímyndar sér, auk þess sem það er mikið betra en þetta þurrkaða - ætla að reyna að venja mig á þetta.

Með þessu var svo gerð fennel/grænmetissósa, sem vinur minn sem er atvinnukokkur gerði með mér - hrikalega gott!

Uppskriftin var eftirfarandi

300 gr hveiti

1 tsk salt

3 egg

2 gulrætur

1 haus ferskt fennel

3-4 tómatar

1-2 hvítlauksrif

1 laukur

Salt og pipar

Oreganó

Byrjuðum á að sigta hveitið og saltið á hreint eldhúsborð

Brutum svo eggin ofan í holu sem hafði verið gerð í hveitið

Svo var bara að nota puttana til að blanda saman

eggjunum og hveitinu

Galdurinn er að byrja í miðjunni

en ýta svo hveitinu af endunum inn á við

og úr verður þetta líka fína pasta deig.

Best er ef hægt er að leyfa því að standa í

plastpoka í 15-20 mínútur.

Við ákváðum að hafa tvennskonar pasta,

venjulegt og gulrótar, þannig að ég sauð tvær gulrætur

þar til þær voru orðnar mjúkar og auðvelt að

mauka þær með gaffli

Auðvitað hefði verið heppilegast að hnoða

gulrótina strax inn í helminginn af deiginu ...

en þetta var svona eftiráhugsun

og kom alls ekki illa út!

Þá var það sósan, fyrst var fennelið skorið í litla bita,

sem og tómatarnir og hvítlaukurinn

og þessu og lauknum blönduðum við saman í stórri skál

Hituðum svo smá ólífuolíu í djúpri pönnu og

steiktum svo grænmetisblönduna þar

Kryduðum svo með smá oreganó og basil,

salti og pipar og leyfðum þessu að sjóða

í sirka 15 mínútur

Á meðan sósan mallaði var svo að búa til tagliatelle

Notaði pastavélina til að fletja út þunna renninga,

bæði venjulegan

og svo með gulrótum

svo var bara að nota vélina til að skera pastað

í þunna renninga = tagliatelle

Jammí hvað þetta var girnilegt

og var eiginlega alveg hrikalega gaman að gera þetta!

Svo var bara að skella pastanu í pott í sirka 3 mínútur

og svo var bara að bera þetta fram.

Verð að viðurkenna að fennelið kom skemmtilega á óvart, hafði aldrei notað það áður og var því spennt að smakka. Þetta var hrikalega gott, ferskt, létt og bragðgott!

Mæli hiklaust með þessu, hollt og gott :-)

Meira síðar.

Eftirréttur: Pæ með sætum kartöflum og sykurpúðum

2011-11-13T10:47:00.002Z

Jæja, komin heim úr Evrópureisunni miklu :-) Átti yndislegar stundir á Ítalíu, skelli jafnvel inn myndum hér síðar í dag ... en það er löngu kominn tími á blogg! Takk fyrir þolinmæðina kæru vinir.

Það er ekkert matarboð fullbúið án þess að hafa eftirrétt! Ég ákvað að halda þakkargjörðarþemað og skellti í pæ fyllt með sætum kartöflum og toppað með sykurpúðum.

Pæið reyndist alveg hreint hrikalega gott þrátt fyrir að það hafi orðið örlítið slys ... þ.e. hafði pæið aðeins aaaðeins of lengi inni eftir að ég setti sykurpúðana á. En það kom ekki að sök, eiginlega bara hrikalega gott :-)

Uppskriftin var eftirfarandi ...
Pæ skelin
3 1/2 dl hveiti
1 msk sykur
1/2 tsk salt
6 msk kalt smjör
60 ml kaldur rjómaostur
1 tsk eplasafi

Fyllingin
2 sætar kartöflur
2 msk hlynsýróp
1 dl matreiðslurjómi
1 1/2 dl sykur
2 stór egg
1 tsk kanill
1/2 tsk malað engifer
1/4 dl malaður múskat

2 sætar kartöflur, afhýddar og ...

skornar í grófa bita

Skellti þeim svo í pott ásamt vatni þannig að flaut yfir,

setti svo líka smá salt, ca 1/2 tsk og leyfði þessu svo

að sjóða í sirka 20 mínútur, eða þar til kartöflurnar

voru farnar að mýkjast

Á meðan kartöflurnar suðu gerði ég deigið ...

sko, ég myndi eiginlega mæla með því að

gera það daginn áður, en út af því að ég var

alveg hreint ógurlega upptekin dagana á undan

þá sleppti ég því, mæli nú samt með hinu.

En í staðinn komst ég að því að það er alveg hægt

að gera þetta eins og ég gerði ...

Skellti saman í skál hveitinu, sykrinum og saltinu

Bætti svo út í smjörinu (kalt) sem ég hafði skorið í bita

og lét svo matvinnsluvélina þeyta þessu saman

þangað til blandan leit út eins og bitar.

Þá bætti ég rjómaostinum út í og þeytti meira

og að lokum hellti ég eplasafanum út í og hrærði

og út kom þetta fína deig sem fór beint inn í frysti.

Þá passaði akkúrat að kartöflurnar voru soðnar.

Þá var bara að skella þeim í matvinnsluvélina með

hnífinn á og hakka vel og vandlega ...

Bætti smá hlynsýrópi út í ...

og voilá þetta líka flotta purré tilbúið.

Setti það til hliðar og leyfði að kólna alveg.

Á meðan var komið aftur að skelinni.

Deigið hafði aðeins náð að stirðna í frystinum,

ekki alveg nóg en þetta hafðist alveg.

Flatti það einfaldlega út og ...

skellti svo í pæformið og reyndi að láta þetta líta vel út.

Á þessu stigi á helst að leyfa botninum að kólna aftur

Skellti svo smjörpappir yfir og makkarónum ofan á

(átti ekki baunir) til að koma í veg fyrir að

það myndu mynast loftbólur ... og skellti svo

inn í ofninn við 180°C í um 20 mínútur, fjarlægði

svo baunirniar og setti aftur inn í ofn í 10 mínútur.

Út kom þessi líka flotta pæ skel sem svo var sett til

hliðar og leyft að kólna (setti hana meira að segja

út í glugga :-)

Þá var það fyllinginn. Setti í skál 4 dl af purré-inu,

ásamt matreiðslurjómanum ...

og sykri auðvitað

og tveimur eggjum ...

og að lokum kryddunum.

Notaði svo einfaldlega handþeytara til að

þeyta þetta allt saman

Svo var bara að skella fyllingunni í skelina

og baka við 180°c í um það bil 1 klst,

gott er að setja álpappír yfir endana ef þið

óttist að þeir séu að brenna. Tók pæið svo út úr

ofninum og leyfði að jafna sig aðeins.

En þá kom klúðrið mikla - að lokum setti ég sum sé

sykurpúða ofan á pæið og skellti inn í ofninn

við aaaaaðeins of háan hita eða kannski frekar,

ég setti það á háan hita og grill (220°C)

og af því það var svo hrikalega gaman hjá okkur

þá tókst mér auðvitað að hafa það aðeins of lengi inni

En þetta kom svona út :-)

Það kom nú reyndar svo ekki að sök, því namm

hvað þetta var rosalega hrikalega gott!

Mæli hikstalaust með þessu - alveg hreint hrikalega svakalega gott og líka pinku öðruvísi og auðvitað meinhollt!

Meira síðar.

Hlynsýrópgljáður kalkúnn með sítrusfyllingu

2011-11-10T01:14:00.000Z

Það dugði auðvitað ekkert minna en kalkúnn til að fagna eins árs bloggafmælinu! Eftir mikla yfirlegu ákvað ég að blanda saman nokkrum uppskriftum sem ég átti og nota hugarflugið aðeins, krossa fingur og vona að það kæmi eitthvað gott út úr þessu - Það gerði það svo sannarlega! Namm hvað þetta var gott :-)

Uppskriftin var eftirfarandi ... fyrir 12-14
5-6 kg kalkúnn

4 dl púðursykur
1 dl gróft salt
2 dl hlynsýróp
1 dl sojasósa
2 tsk svört piparkorn
6 kanilstangir
8 lárviðarlauf
4 lítrar vatn
2 kjúklingateningar

1 grænt epli
1 rautt epli
1 sítróna
1 appelsína
2 laukar

115 gr smjör
4 msk ólífuolía
1/2 dl eplasafi
2 dl hlynsýróp

Byrjaði á að kaupa kalkúninn og setja hann inn

í ískáp til að leyfa honum að afþýðast, setti hann

í ískápinn á mánudagskvöldi fyrir afmælið á föstudegi

Á fimmtudeginum tók ég hann svo út úr ískápnum og

fór að undirbúa brýninguna/mareneringuna

Byrjaði á að finna til púðursykur ...

og salt

og setti hvoru tveggja í stóran pott,

bætti svo út í pottinn hlynsýrópi

A-grade from Vermont :-)

og sojasósu,

piparkornunum auðvitða,

Kanilstöndum (tvær þeirra voru svo

stórar að ég taldi þær sem fjórar),

og loks lárviðarlauf

Þessu skellti ég öllu saman í pott og leyfði suðunni að

koma upp, hrærði reglulega.

Þegar sykurinn hafði leysts upp bætti ég

vatninu og teningunum út í og leyfði suðunni

að koma upp að nýju. Þegar suðan var komin upp

slökkti ég undir pottinum og setti hann til hliðar

og leyfði blöndunni að kólna alveg.

Á meðan tók ég kalkúninn og kom honum

fyrir í stóru plastboxi sem ég átti uppi í geymslu.

Hellti svo hlynsýrópsblöndunni yfir kalkúninn,

skellti lokinu á kassann og setti kassann með kalkúninum

í út á svalir fram á næsta dag. Þegar ég vaknaði um

morguninn snéri ég kalkúninum og svo aftur

þegar ég kom heim úr vinnu.

Þá var kominn hátíðardagurinn og

tími til að undirbúa fyllinguna.

Byrjaði á að skera laukinn í stóra bita, skar fyrst til

helminga og svo aftur til helminga og svo aftur.

Skar svo eplið og appelsínuna,

og sítrónuna í nokkuð grófa bita.

Setti þetta svo til hliðar.

Því nú var kominn tími til að þerra kalkúninn áður

en hann yrði fylltur.

Skellti fyllingunni einfaldlega inn í hann,

pipraði hann svo aðeins og dreifði saxaðri salvíu yfir,

samt bara sirka 5 blöðum. Blandaði saman bráðnu

smjöri og ólífuolíu. Penslaði svo fuglinn með sirka

helmingnum af blöndunni. Skellti kalkúninum

svo inn í ofn við um 160°C í eina klukkustund.

Á meðan fuglinn var í ofninum tók ég restina af

smjörblöndunni og setti í stærri skál.

Bætti út í eplasafa ...

og hlynsýrópinu

og notaði svo gaffal til að blanda öllu vel saman.

Þegar fuglinn hafði verið inn í ofninum í eina klukkustund

tók ég hann út ...

og penslaði með hlynsýróps/smjörblöndunni

vel og vandlega og skellti svo aftur inn í ofninn

í sirka þrjá tíma í viðbót eða þar til

kjöthitamælirinn var kominn í 76°C.

Ég tók hann þó út á sirka 20-25 mínútna fresti

og penslaði aðeins, með bráðnu smjöri,

bara svona til að halda honum mjúkum og flottum.

Út kom þessi líka fallegi fugl

og ekki skemmdi fyrir hvað hann var djúsí :-)

Hann var einfaldlega góður. Ótrúlega meyr og bragðgóður. Hann var svo eiginlega enn betri daginn eftir og margfalt betri daginn þar á eftir! Nammi namm, kalkúnaafgangar!

Ég mæli hiklaust með þessari uppskrift. Hún er aðeins öðruvísi en margar aðrar sem ég hef smakkað, en kom virkilega vel út. Fyllingin sjálf var ekki borðuð, en ég var með aðra fyllingu til að borða, með eplum og beikon, en hún kemur inn (meira) síðar.

Eins árs afmæli - Smjörhnetusúpa

2011-11-07T21:44:00.000Z

Ég veit ekki hvort þið trúið því (ég trúi því varla sjálf) en ég er búin að vera með þetta blogg núna í rúmt eitt ár! Þetta blogg hefur fylgt mér í gegnum súrt og sætt síðasta árið og fátt hefur hjálpað mér jafn mikið síðasta árið eins og að dunda mér í eldhúsinu (fyrir utan fjölskyldu og vini auðvitað). Ég hef reyndar ólýsanlega oft verið nærri því að missa símann ofan í kökudeig eða steikingarpönnuna. Þetta hefur þó allt endað vel að lokum og meira að segja hefur mest af matnum barasta komið ágætlega út sömuleiðis.

Það kom því ekkert annað til greina en að halda upp á afmælið með stæl eins og tilraunaeldhúsinu er einu lagið! Þá loks ég hafði tíma og tækifæri til var boðað til veislu og var vinum og helstu þolendum síðasta árs boðið.

Í forrétt var smjörhnetusúpa, í aðalrétt kalkúnn og ekkert rosalega mikið meðlæti (lesist heeeelling af meðlæti) og í eftirrétt pæ úr sætum kartöflum og sykurpúðum.

Að öllu öðru ólöstuðu þá verður að viðurkenna að forrétturinn stal senunni, reyndar var kalkúnninn líka rosalega góður og pæ-ið hrikalega gott líka en súpan var nánast ólýsanlega góð - þó ég segi sjálf frá.

Versta var þó að það tók heilmikinn tíma og nokkra aðstoð (Takk Hildur Sólveig og Hálfdán Bjarki, án ykkar hefði ég aldrei klárað þetta) að elda þetta sem svo varð til þess að myndatakan misheppnaðist stundum öööörlítið, þið verðið bara að afsaka það :-)

Uppskriftin var eftirfarandi ... fyrir 12
1 1/2- 2 tsk cumin
1 msk ólífuolía
2 laukar
1 hvítlauksgeiri
1 msk ferskt engifer, rifið
2 tsk kórianderduft
2 þurrkuð chillí
2 kg smjörhneta (vigt miðuð við áður en þetta er hreinsað)
2 lítrar grænmetissoð
Búnt af ferskum kóriander

Engiferrjómi
1 dós sýrður rjómi
160 ml rjómi
2 tsk rifið engifer
2 tsk sítrónusafi
2 msk saxað kóriander

Byrjaði á að afhýða og skera smjörhneturnar í bita,

bitana hafði ég ekkert of stóra en samt ekkert litla,

sirka 3x2 cm. Setti bitana svo til hliðar.

Þá var að byrja á súpugerðinni sjálfri. Byrjuðum á því

að hita cuminfræ í ólífuolíu á pönnu. Þegar fræin byrjuðu

að poppa voru þau tilbúin og sett til hliðar.

Þá var að draga fram stóra súpupottinn.

Skellti ólífuolíu í botninn og byrjaði á að steikja

laukinn sem ég hafði saxað smátt.

Bætti svo út í hvítlauknum sem var skorinn smátt, ásamt

engiferinu, kórianderduftinu og þurrkaða chillíinu

sem ég muldi niður.

Hellti svo soðinu út í pottinn og leyfði þessu að sjóða í

sirka 20 mínútur eða þar til smjörhnetan var farin að mýkjast

Á meðan súpan sauð skellti ég sýrða rjómanum í

skál ásamt rjómanum og engiferinu og hrærði

saman með gaffli

Bætti svo sítrónusafanum út í og hrærði betur

Svo var bara að bæta kóriander út í

skálina og hræra saman og setti á borðið

enda stutt í að súpan yrði tilbúin.

Þá var að nota snilldartækið sem töfrasprotinn er til

að hakka smjörhnetuna og laukinn - en ég verð að

viðurkenna að þetta eru bestu kaup sem ég hef gert

á þessu síðasta ári! Ef þið eigið ekki slíkt snilldar-

tæki þá er líka hægt að hella súpunni úr pottinum og í

blandara og hakka súpuna þannig.

Lofaði góðu strax í pottinum!

Þá var að bera súpuna fram ... súpa sett í skál

(eða bolla ...)

Þá var það engifer rjóminn

sem ég lét drjúpa í súpuna

og svo smá kóriander og svo var það bara

himnasæla hjá bragðlaukunum!

Þessi súpa var einfaldlega fáránlega góð og ég get ekki beðið eftir að gera hana aftur sem verður svo sannarlega fljótlega því namm, bragðlaukana mína dreymir um að smakka hana aftur :-)

Meira síðar.

Átta laga ídýfa með heimagerðri baunastöppu

2011-11-01T16:40:00.000Z

Þessa ídýfu þekkja örugglega margir en hún er alltaf jafn góð :-) Þessi er þó kannski aðeins öðruvísi að því leiti að ég gerði hana alveg frá grunni, þ.e. keypti baunir og sauð og kryddaði sjálf í staðinn fyrir að kaupa tilbúnar refried baunir í dós.

Þetta var alveg hreint hrikalega gott!

Uppskriftin var eftirfarandi ...
1 dós nýrnabaunir
1 laukur
1 1/2 tsk cumin
1/2 tsk salt
1/2 tsk cumin
1/2 tsk salt
3/4 tsk paprikuduft
1/4 tsk kórianderduft
1 msk mataredik
2 msk tómatpúrra
8 dropar tabasco sósa

2 avocado
Salt og pipar
Safi úr einni sítrónu
1 dós sýrður rjómi
1 tsk chilliduft
1 1/2 tsk cumin
2 tómatar
3 vorlaukar
2 dl cheddar ostur
Steinselja

Byrjaði á að skera laukinn frekar smátt

Hellti af baununum og setti í pott, ásamt vatni - rétt

nóg til að flyti yfir baunirnar, setti svo laukinn út í

og 1 1/2 tsk cumin

Notaði sleif til að blanda öllu saman og leyfði

suðunni að koma upp við meðal hita - leyfði

að sjóða í sirka 5 mínútur.

Á meðan baunirnar suðu vann ég að avocado skurði

Byrjaði á að skera þau í tvennt og fjarlægja steininn,

skar þau svo í þrennt áður en ég afhýddi þau

Notaði svo gaffal til að stappa avókadóin, kreisti svo

safa úr einni sítrónu yfir

Bætti svo við salti og pipar og hrærði vel saman,

setti svo til hliðar í bili enda var kominn aftur

tími til að vinna með baunirnar.

Hellti vatninu (því litla sem var eftir) af baununum og

setti baunirnar og laukinn í matvinnsluvél.

Bætti svo út í 1/2 tsk cumin ...

1/2 tsk salti

3/4 tsk chilliduft

1 msk mataredik

1/4 tsk kórianderduft og 2 msk tómatpúrré,

tabascosósan ... namm hvað þetta lofaði góðu :-)

Svo var bara að hræra þetta allt saman,

setti svo til hliðar og leyfði að kólna.

Tók þá fram sýrða rjómann og chilliduft,

og cumin ...

og notaði svo einfaldlega gaffal til að hræra öllu saman.

Svo var bara að taka fram fat, og setti baunirnar í botninn

þar yfir setti ég avókadóið ...

þar yfir sýrða rjómann ...

Skar svo tómatinn í bita ...

og dreifði yfir

Skar svo laukinn í bita

og dreifði yfir ásamt ólívum

Dreifði svo ostinum yfir og skellti smá steinselju þar yfir

Nammi namm, lítur vel út ekki satt? :-)

Ég bar þetta svo fram einfaldlega með nachos-flögum og þetta var eiginlega bara virkilega gott, mæli hiklaust með þessu!

Meira síðar.